ՊԵԿ-ը իրազեկում է շրջանառության հարկի գումարից ծախսերի նվազեցման առանձնահատկությունների մասին ըստ գործունեության տեսակների

2025 թվականից շրջանառության հարկ վճարողները առևտրական, արտադրական, աշխատանքների կատարման, ծառայությունների մատուցման գործունեության տեսակների մասով հաշվարկված շրջանառության հարկի գումարից օրենսգրքով սահմանված կարգով նվազեցնում են այդ գործունեության տեսակների հետ կապված ծախսերը։ Այդ մասին հայտնում են ՊԵԿ-ից:

 

Ստորև ներկայացնում ենք շրջանառության հարկի գումարից ծախսերի նվազեցման առանձնահատկություններն ըստ գործունեության տեսակների։

 

Առևտրական գործունեության մասով․

 

շրջանառության հարկը հաշվարկվում է 10% դրույքաչափով.

շրջանառության հարկի գումարից նվազեցվում են հաշվետու եռամսյակում ձեռք բերված առևտրական գործունեության առարկա հանդի­սացող ապրանքների սկզբնական արժեքի, ինչպես նաև հաշվետու եռամսյակում կատարված վարչական և իրացման ծախսերի հանրագումարի 9.5%-ը.

եթե ծախսերը նվազեցնելուց հետո շրջանառության հարկի գումարը կազմում է առևտրական գործունեությունից ձևավորվող հարկման բազայի 1%-ից պակաս գումար, ապա ծախսերը նվազեցվում են այն չափով, որ շրջանառության հարկի գումարը կազմի առևտրական գործունեությունից ձևավորվող հարկման բազայի 1%-ը.

ծախսերի չնվազեցված մասը նվազեցվում է հետագա հաշվետու եռամսյակների համար առևտրական գործունեության մասով հաշվարկված շրջանառության հարկի գումարից։

 

Արտադրական գործունեության մասով․

 

շրջանառության հարկը հաշվարկվում է 7% դրույքաչափով.

շրջանառության հարկի գումարից նվազեցվում են արտադրության հետ անմիջականորեն կապված՝ հաշվետու եռամսյակում ձեռք բերված ապրանքների, ստացված ծառայությունների, ընդուն­ված աշխատանքների գծով ծախսերի, ինչպես նաև հաշվետու եռամսյակում կատարված վարչական և իրացման ծախսերի հանրագումարի 5%-ը.

եթե ծախսերը նվազեցնելուց հետո շրջանառության հարկի գումարը կազմում է արտադրական գործունեությունից ձևավորվող հարկման բազայի 3%-ից պակաս գումար, ապա ծախսերը նվազեցվում են այն չափով, որ շրջանառության հարկի գումարը կազմի արտադրական գործունեությունից ձևավորվող հարկման բազայի 3%-ը.

ծախսերի չնվազեցված մասը նվազեցվում է հետագա հաշվետու եռամսյակների համար արտադրական գործունեության մասով հաշվարկված շրջանառության հարկի գումարից։

 

Հանրային սննդի գործունեության մասով․

 

շրջանառության հարկը հաշվարկվում է 12% դրույքաչափով.

շրջանառության հարկի գումարից նվազեցվում են հանրային սննդի ծառայության մատուցման հետ անմիջականորեն կապված՝ հաշվետու եռամսյակում ձեռք բերված ապրանքների, ստացված ծառայությունների, ընդուն­ված աշխատանքների գծով ծախսերի, ինչպես նաև հաշվետու եռամսյակում կատարված վարչական և իրացման ծախսերի հանրագումարի 9%-ը.

եթե ծախսերը նվազեցնելուց հետո շրջանառության հարկի գումարը կազմում է հանրային սննդի գործունեությունից ձևավորվող հարկման բազայի 3,5%-ից պակաս գումար, ապա ծախսերը նվազեցվում են այն չափով, որ շրջանառության հարկի գումարը կազմի հանրային սննդի գործունեությունից գործունեությունից ձևավորվող հարկման բազայի 3,5%-ը.

ծախսերի չնվազեցված մասը նվազեցվում է հետագա հաշվետու եռամսյակների համար հանրային սննդի գործունեության մասով հաշվարկված շրջանառության հարկի գումարից։

 

Աշխատանքների կատարման, ծառայությունների մատուցման գործունեության մասով․

 

շրջանառության հարկը հաշվարկվում է 10% դրույքաչափով.

շրջանառության հարկի գումարից նվազեցվում են աշխատանքների կատարման, ծառայությունների մատուցման հետ անմիջականորեն կապված՝ հաշվետու եռամսյակում ձեռք բերված ապրանքների, ստացված ծառայությունների, ընդուն­ված աշխատանքների գծով ծախսերի, ինչպես նաև հաշվետու եռամսյակում կատարված վարչական և իրացման ծախսերի հանրագումարի 6%-ը.

եթե ծախսերը նվազեցնելուց հետո շրջանառության հարկի գումարը կազմում է աշխատանքների կատարման, ծառայությունների մատուցման գործունեությունից ձևավորվող հարկման բազայի 4,5%-ից պակաս գումար, ապա ծախսերը նվազեցվում են այն չափով, որ շրջանառության հարկի գումարը կազմի աշխատանքների կատարման, ծառայությունների մատուցման գործունեությունից ձևավորվող հարկման բազայի 4,5%-ը.

ծախսերի չնվազեցված մասը նվազեցվում է հետագա հաշվետու եռամսյակների համար աշխատանքների կատարման, ծառայությունների մատուցման գործունեության մասով հաշվարկված շրջանառության հարկի գումարից։

 

Շրջանառության հարկի գումարից ծախսերի նվազեցման վերաբերյալ մանրամասները՝ այստեղ: