Ղարաբաղյան շարժումը շարունակելու ցանկացած փորձ կործանարար է. Փաշինյան

Պետականության կառուցումը մեզ համար բացարձակ առաջնահերթություն է, ԱԺ-ում այս մասին հայտարարեց վարչապետ Նիկոլ Փաշինյանը։

«1980-ականների վերջին Հայաստանի անկախության գաղափարը գեներացվել է ոչ թե հանուն անկախության ու պետականության, այլ՝ հանուն Ղարաբաղի խնդրի լուծման, այսինքն՝ մենք անկախ պետություն ստեղծել ենք ոչ թե ավելի լավ կյանքի, այլ՝ Ղարաբաղի հարցի համար»,- ասաց նա։

Ըստ Փաշինյանի՝  շուրջ 30 տարի կառուցվել է պետության մի մոդել, որը հիմնականում նվիրված է եղել Ղարաբաղի հարցի լուծմանը, Ղարաբաղյան շարժմանն ու հանուն դրա ամեն ինչ զոհաբերելու տրամաբանությանը։

«Սա չեմ ասում որպես քննադատություն, այլ ասում եմ որպես իրողություն, որովհետև բոլորս հաշտ ենք եղել այդ մոդելի ու նպատակադրման հետ, ինքնս էլ հաշտ եմ եղել այդ մոդելի հետ մինչև այն պահը, երբ, որպես ՀՀ վարչապետս, փաստերին ու տեղեկություններին հասանելիություն ստանալուն զուգընթաց՝ կամաց-կամաց, քայլ-քայլ հասկացել եմ, որ եթե մեզ համար անկախությունը, պետականությունը միջոց են Ղարաբաղի հարցի մեր պատկերացրած լուծման համար, մի շարք արտաքին դերակատարների համար Ղարաբաղի հարցը միջոց է մեր անկախությունը, պետականությունը, զարգացումը, բերեկեցությունը թույլ չտալու, ապա և մեր պետականությանը վերջ դնելու համար»,- նշեց նա։

Վարչապետի խոսքով՝ այդ նպատակը մեկնարկել է 2018 թվականին, եզրափակիչ փուլ է մտել 202 թվականի սեպտեմբերին, գագաթնակետին հասավ 2021 թվականի մայիսին ու այդ վերջնանպատակը գործակիցներ ունի Հայաստանում։

«Նրանք կարծում են, որ Ղարաբաղի հարցն է կարևոր, ոչ թե անկախությունն ու պետականությունը»,- հայտարարեց Փաշինյանը։

Նա շեշտեց՝ Ղարաբաղյան շարժումը շարունակելու ցանկացած փորձ կործանարար է։

«Այն եղել է ու լինելու է գործիք՝ Հայաստանի պետությունը, անկախությունը, ինքնիշխանությունը թույլ չտալու համար, մենք սա, ցավոք, շատ ուշ ենք հասկացել, իսկ ընդդիմությունն ասում է, որ ՀՀ պետականությունը մի նպատակ ու իմաստ է ունեցել ու ունի՝ Ղարաբաղյան շարժում, Ղարաբաղի հարց»,- ասաց նա։