Ամերիկացիների մեծ մասը Թրամփի քաղաքականությունն անվանել է «քաոսային» և «վախեցնող». NYT

Ամերիկացի ընտրողների կեսից ավելին ԱՄՆ գործող նախագահ Դոնալդ Թրամփի քաղաքականությունը անվանել է «քաոսային» և «վախեցնող»։ Այս մասին են վկայում The New York Times-ի և Սիենա քոլեջի կողմից անցկացված սոցիոլոգիական հարցման արդյունքները՝ հանրապետականի՝ որպես պետության ղեկավարի առաջին 100 օրվա նախօրեին։

Հետազոտությունը անցկացվել է ապրիլի 21-24-ը։ Դրան մասնակցել է երկրի ավելի քան 900 բնակիչ, իսկ սխալի միջակայքը կազմել է 3,8%։

Հարցման ընթացքում վերլուծաբանները պարզել են, որ հարցվածների 66%-ը Թրամփի քաղաքականությունը համարում է «քաոսային»։ Հետազոտության մասնակիցների 59%-ը Սպիտակ տան ղեկավարի գործողությունները անվանել է «սարսափելի»։

Հարցվածներից միայն 42%-ն է նշել, որ հավանություն է տալիս պետության գործող ղեկավարի աշխատանքին։ Հարցվածների 54%-ը հակառակ կարծիքն ունի, մինչդեռ մնացածը չի կարողացել միանշանակ գնահատել Թրամփի գործունեությունը։

Հարցվածների կեսից մի փոքր պակասը՝ 47%-ը, համաձայն է ԱՄՆ նախագահի ներգաղթային քաղաքականության հետ։ Նրա մոտեցումը տնտեսությանը, արտաքին առևտրին և Ուկրաինայի հակամարտությանը հավանության է արժանացել մասնակիցների համապատասխանաբար 43%-ի, 42%-ի և 35%-ի կողմից։

Ընտրողների 36 %-ը նշել է, որ Թրամփի քաղաքականությունը վնասել է իրենց։ Հարցվածների ևս 17%-ը նշել է, որ ամերիկացի առաջնորդի գործողությունները իրենց օգուտ են բերել։ Մնացածը կամ տարբերություն չեն տեսել, կամ դժվարացել են պատասխանել։