Քիմ Քարդաշյանը կհարցաքննվի Փարիզում

Փարիզում մեկնարկում է Քիմ Քարդաշյանի՝ 2016 թվականին Ֆրանսիայի մայրաքաղաքում կատարված կողոպուտի գործով դատավարությունը։

«Ծեր կողոպտիչներ» (grandpa robbers) կոչվող տղամարդկանց խումբը այն 10 անձանց թվում է, որոնք պետք է դատվեն Քիմ Քարդաշյանից միլիոնավոր դոլարների զարդեր գողանալու համար։

Քիմը կմեկնի Փարիզ՝ մեղադրյալների դեմ ցուցմունք տալու համար դատավարության ժամանակ, որը կտևի գրեթե մեկ ամիս, ասել է նրա փաստաբանը։

Կասկածյալները, դիմակներ և ոստիկանական նշաններով հագուստ կրելով, կապել են Քարդաշյանին շքեղ համարի ննջասենյակում, ապա գողացել են 4 միլիոն դոլար արժողությամբ նշանադրության մատանին, որը նրան նվիրել էր այն ժամանակվա ամուսինը՝ ռեփեր Քանյե Ուեսթը, և այլ զարդեր։

Քարդաշյանի փաստաբանական թիմը հայտարարել է, որ նա մեկնաբանություն չի տա մինչև դատավարության ավարտը։

«Տիկին Քարդաշյանը ցանկանում է, որ դատավարությունն անցկացվի կարգուկանոնով՝ ֆրանսիական օրենսդրությանը համապատասխան և գործի բոլոր կողմերի նկատմամբ հարգանքով»,– ասել է նրա թիմը։

Դատարանում կհայտնվի տասը մարդ։ Նրանցից հինգին մեղադրանք է առաջադրվել զինված կողոպուտի և մարդու առևանգման համար։ Մնացածը մեղադրվում են կողոպուտին հանցակցության կամ զենքի ապօրինի պահման մեջ։

Մեղադրյալներից մեկը՝ 71-ամյա Յունիս Աբբասը, խոստովանել է իր մասնակցությունը կողոպուտին։ Նա ֆրանսիական TF1 հեռուստաալիքին ասել է, որ որպես թոշակառու դժվարանում է ծայրը ծայրին հասցնել՝ իր աշխատանքային կյանքի 20 տարին բանտում անցկացնելուց հետո։ «Մեծը պետք է վերջինը լիներ», - ասել է նա՝ հավելելով, որ իրեն ասել են, որ թիրախը մեծ ադամանդն է, բայց պատկերացում անգամ չի ունեցել, թե ում է այն պատկանում։

Աբբասի փաստաբան Գաբրիել Դումեսնիլը «Ռոյթերս»-ին ասել է, որ իր պաշտպանյալը հարցաքննության ժամանակ անմիջապես խոստովանել է իր մասնակցությունը կողոպուտին։ Աբբասը հերքում է, որ խմբավորման ղեկավարն է և չգիտեր, որ զենք կօգտագործվի, ասել է նրա փաստաբանը։