ՄԱԿ-ը ֆինանսական լուրջ խնդիրներ ունի ԱՄՆ-ի պատճառով․ Reuters

ՄԱԿ-ն ուսումնասիրում է իր կառույցի մասշտաբային բարեփոխում իրականացնելու տարբերակը՝ ֆինանսավորման հետ կապված խնդիրների պատճառով: Այդ մասին հայտնել Է Reuters գործակալությունը՝ վկայակոչելով հուշագիրը, որը պատրաստել է համաշխարհային կազմակերպության գլխավոր քարտուղար Անտոնիո Գուտերեշի աշխատանքային խումբը:

Նախաձեռնության շրջանակներում առաջարկվել է ստորաբաժանումները միավորել չորս հիմնական ուղղությունների՝ խաղաղություն և անվտանգություն, հումանիտար խնդիրներ, կայուն զարգացում և Մարդու իրավունքներ: Մասնավորապես, փաստաթղթի հեղինակները կարծում են, որ ՅՈՒՆԻՍԵՖ-ը, ԱՀԿ-ն, Պարենի համաշխարհային ծրագիրը և փախստականների գործերի վարչությունը պետք է դառնան միասնական մարդասիրական կառույց: 

Հրապարակման մեջ ասվում է, որ ԱՄՆ-ն, որը ՄԱԿ-ի ֆինանսավորման հիմնական աղբյուրն է, 1,5 մլրդ դոլար է պարտք կանոնավոր բյուջեին հատկացումների շրջանակներում և 1,2 մլրդ դոլար՝ խաղաղապահ առաքելություններին աջակցելու համար: Նշվում է, որ դա արդեն հանգեցրել է մի շարք կառույցներում կրճատումների։