«Վեստ-Արմենիան»՝ սնա՞նկ․ ֆուտբոլիստները մինչև այսօր աշխատավարձ չեն ստացել

Մարզական լրագրող Ռոբերտ Գասպարյանը Տելեգրամի իր ալիքում ««Վեստ-Արմենիան»՝ սնա՞նկ» վերնագրով հրապարակում է կատարել՝ անդրադառնալով ֆուտբոլային ակումբում առկա խնդիրներին։

Նա, մասնավորապես, գրել է․

«Հայկական ֆուտբոլի նվիրյալներին ու «նվիրյալներին» հրավիրում եմ մի 2 րոպե ուշադրություն։ Խայտառակ իրավիճակ «Վեստ-Արմենիայում»։ Խայտառակ՝ բառիս ուղիղ իմաստով։ Ֆուտբոլիստներն անվճար ֆուտբոլ են խաղում։ Ո՞նց է ձեզ համար այս լուրը։ Գանք հեռվից։

Ես ունեմ տեղեկություններ, որ ակումբում իսկական քաոս է։ Մրցաշրջանի սկզբում «Վեստ-Արմենիան» ձեռք բերեցին ինչ-որ մարդիկ, խոսվեցին ներդրումների ու հեռանկարների մասին, արժանի ու հավասար պայքարի մասին։ Սակայն նոր մրցաշրջանի առաջին իսկ օրից ակումբում դրամային շրջանառությունն ահավոր մակարդակի վրա է։ Մինչև ձմեռային դադար ակումբի սեփականատեր ասեմ, նախագահ ասեմ, չգիտեմ, ֆուտբոլիստների աշխատավարձերը տվել են կես-կես, մանր-մանր, մինչդեռ զգուշացրել էին ի սկզբանե, որ աշխատավրձերը պիտի լինեն ճիշտ գրանցված, վճարումներն արվեն ժամանակին, եկամտահարկով, սակայն հայկական ձևերով, բնականաբար, ոչինչ չեղավ։ Ինչ-որ պահի նույնիսկ աղմուկ եղավ, որ «Վեստի» տղաները չէին ցանկանում այլևս դաշտ դուրս գալ մինչև չմարվեն իրենց պարտքերը։ Սակայն ձեռք բերվեց պայմանավորվածություն գումարի կեսը վճարել մինչև խաղը, հաջորդ կեսը՝ խաղից հետո։ «Խաղից հետո»-ն դարձավ մրցաշրջանի առաջին հատվածի ավարտ, որը մի կերպ ամփոփվեց։ 

Նոր խաղաշրջանն արդեն հատել է մայիս ամիսը, սակայն «Վեստ Արմենիայի» ֆուտբոլիստները մինչև այսօր որևէ աշխատավարձ չեն ստացել։ Փակվել է միայն հունվար ամսվա աշխատավարձը։ Որպես պատճառաբանություն բերվում է, որ «Վեստ Արմենիայի» նախագահ-սեփականատիրոջը խաբել է ինչ-որ գործընկեր, որը ֆուտբոլիստների հետ զրուցելուց հետո անձամբ է խոստացել մարել բոլորի պարտքերը ու ներկայացրել է ինչ-որ փաստաթուղթ։ Բայց մինչև այսօր ոչ գումարը, կա, ոչ էլ այդ բիզնես-գործընկերը։ Ակումբի նախագահն էլ ասում է, որ պատրաստվում է թիմը փակել։ Ըստ իմ ունեցած տեղեկությունների՝ լեգեոներների տան հարցը ևս կախված է օդում։ 

Հայկական ֆուտբոլի զարգացումը սկսվում է այստեղից, ոչ թե փոքր խաղադաշտեր կառուցելուց։ Դաշտերը որ կառուցվում են, պետք է անել այնպես, որ այնտեղ ֆուտբոլ խաղան, խաղացողները վճարվեն ըստ օրենքի ու սահմանված կարգի, մարզիչները նորմալ աշխատավարձ ստանան։ Ի վերջո, բոլորն էլ տուն են պահում, ընտանիք են պահում։ 

Դասականը կասեր՝ «Թիմը դուռ չի, որ բացես»։ Այո, իսկապես, որ այդպես է»։