Երբ տուգանքի ծավալը մեծացնենք, չեն խախտի. Էկոնոմիկայի նախարար

«2024 թվականի հունվարի 1-ից ՀՀ-ում ուժի մեջ մտավ ԵԱՏՄ կանոնակարգը, որը վերաբերվում էր ծխախոտային արտադրանքի տեխնիկական պահանջներին։ Մասնավորապես պարտադրվում էր, որ ծխախոտի տուփերի վրա պետք է տեղադրվեն գրաֆիկական նախազգուշացումներով պատկերներ, թե ինչպիսի հետևանքներ կարող է ունենալ ծխելը»,- ԱԺ տնտեսական հարցերի մշտական հանձնաժողովի նիստում ասաց Էկոնոմիկայի նախարար Գևորգ Պապոյանը՝ հավելելով, որ մի շարք տեղական արտադրողներ այդպես էլ չեն համապատասխանեցրել իրենց արտադրանքը սահմանված պահանջներին․

«Շարունակում էին արտադրել և շրջանառության մեջ դնել հին տուփերով ծխախոտներ՝ առանց գրաֆիկական նախազգուշացումների։ Խնդիրը շարունակաբար չէր լուծվում։ Հասկացանք, որ սա անարդար գործելակերպ է, ինչը թե՛ սպառողների, թե՛ մրցակիցների նկատմամբ անհարգալից վերաբերմունք է»,- ասաց Պապոյանը՝ հավելելով, որ ներկա կարգավորմամբ նման իրավախախտման համար նախատեսված 400 հազար դրամ տուգանքը չի համարվում էական ֆինանսական բեռ տնտեսվարողի համար և նպաստում է անօրիանական գործալակերպի շարունակությանը։

«Առավել մրցակցային միջավայր ապահովելու համար նախաձեռնվել է վարչական իրավախախտումների վերաբերյալ ՀՀ օրենսգրքում փոփոխություն կատարել՝ առաջարկելով ավելացնել տուգանքը իրավախատման նախորդ տարվա հասույթի 1% չափով»,- ասաց Պապոյանը՝ շարունակելով․ «Տնտեսվարողները ընդունում են, որ խախտում են կատարել և մեծ հաճույքով վճարում են 400 հազար տուգանքը։ Այսինքն՝ այո՛, խախտել ենք, տուգանքը վճարեցինք, խախտել ենք, վճարեցինք։ Երբ տուգանքի ծավալը մեծացնենք, չեն խախտի, կամ այնքան գումար կվճարեն, որ տված վնասը կփոխհատուցվի»,- ասաց նախարարը։