Անչափահասի ներգրավմամբ, նաև ՏՏ միջոցով թմրամիջոցների ապօրինի շրջանառությունը ծանրացնող հանգամանք կհամարվի և պատիժը կխստանա. նախագիծ

Պետաիրավական հանձնաժողովում քննարկման էր ներկայացվել ՀՀ քրեական օրենսգրքում փոփոխություններ և լրացումներ կատարելու մասին նախագիծը։ 

Հիմնական զեկուցող, նախագծի հեղինակ ՔՊ պատգամավոր Հայկ Սարգսյանը նշեց, որ թմրամիջոցների ապօրինի շրջանառությունը լուրջ խնդիր է ինչպես աշխարհում, այնպես էլ ՀՀ-ում, և այս նախագծով նախատեսում են թմրամիջոցների ապօրինի շրջանառության դրսևորման որոշ հանցատեսակների պարագայում խստացնել պետության քրեաիրավական արձագանքը՝ համաձայնեցնելով վտանգավության աստիճանին։

Պատգամավորը նշեց, որ 2023թ.-ի ընթացքում ՀՀ իրավապահների կողմից հայտանաբերվել է թմրամիջոցների, հոգեմետ նյութերի և դրանց պատրաստուկների հետ կապված հանցագործությունների 5070 դեպք՝ նախորդ տարվա 2266-ի դիմաց։

Ըստ այդմ էլ՝ առաջարկվում է ՀՀ քր.օրենսգրքի 393-րդ 394-ր և 402-րդ հոդվածների ծանրացնող հանգամանք սահմանել արարքը տեղեկատվական կամ հաղորդակցության տեխնոլոգիների միջոցով կատարելը։

Առաձնապես ծանրացնող հանգամանք են սահմանում արարքն անչափահասի նկատմամբ կամ անչափահասին ներգրավմամբ կատարելը։  

Նախագծով թմրամիջոցի, հոգեմետ (հոգեներգործուն) նյութի, դրանց պատրաստուկի կամ դրանց համարժեք նյութի (անալոգի) կամ դրանց ածանցյալի գործածմանը հակելու կամ ներգրավելու համար արարքը ծանրացնող հանգամանքների թվում սահմանվել են նաև անձի անօգնական վիճակն օգտագործելով հանցանքը կատարելու վեաբերյալ կարգավորումներ:

Բացի այդ, նախատեսվել է խստացնել որոշ հանցագործությունների համար քրեական պատասխանատվությունը: Մասնավորապես, ՀՀ քրեական օրենսգրքի 393-րդ հոդվածի 1-ին մասով առաջարկվում է նախատեսել պատիժ՝ 5-8 տարի ժամկետով ազատազրկում, ՀՀ քրեական օրենսգրքի 393-րդ հոդվածի 2-րդ մասով նախատեսել պատիժ՝ 8-12 տարի ժամկետով ազատազրկում, ՀՀ քրեական օրենսգրքի 393-րդ հոդվածի 3-րդ մասով նախատեսել պատիժ՝ 14-20 տարի ժամկետով ազատազրկում կամ ցմահ ազատազրկում, ՀՀ քրեական օրենսգրքի 396-րդ հոդվածի 1-ին մասով նախատեսել պատիժ՝ առավելագույնը 3 տարի ժամկետով ազատազրկում, նույն հոդվածի 2-րդ մասով նախատեսել պատիժ՝ 2-6 տարի ժամկետով ազատազրկում, իսկ նույն հոդվածի 3-րդ մասով նախատեսել պատիժ՝ 4-8 տարի ժամկետով ազատազրկում: