Բա ինչո՞ւ չեք պատմում, որ ձեզ հանեցին ԵԺԿ-ի բանաձևերի ընդունման դահլիճից, ուր խաբելով էիք հայտնվել․ Հայկ Մամիջանյան

Պարոն Խանդանյանը խոսում է իսպանական ամոթից, դե դուք դա շատ պիտի որ զգացած լինեք, հուսով եմ՝ զգացել եք, երբ որ Պրահայում Նիկոլ Փաշինյանն Արցախն Ադրբեջանի կազմում էր ճանաչում, երբ որ ՄԱԿ–ում Հայաստանին հակադարձում էին Փաշինյանի ասածներով, կամ եթե վերջերս Ջերմուկ, Սյունիք, կամ Գեղարքունիք եք գնացել, և տեսել եք այն տարածքները, որ հիմա Ադրբեջանի վերահոսկողության տակ են, կամ եթե ցանկություն առաջանար Արցախ գնալու, այդ ժամանակ պետք է որ իսպանական ամոթ զգայիք։ Այս մասին ԱԺ–ում հայտարարեց ԱԺ «Պատիվ ունեմ» խմբակցության ղեկավար Հայկ Մամիջանյանը։

Անդրադառնալով ՔՊ–ական պատգամավոր Սարգիս Խանդանյանի հայտարարությանը, թե ընդդիմադիր պատգամավորները դիմել են՝ ԵԺԿ–ի օրինագծի դեմ քվեարկելու համար, նա նշեց, որ որևէ մեկին չեն դիմել, բայց շատ անգամներ են խնդրել եվրոպացի գործընկերներին քվեարկել հայանպաստ բանաձևերի օգտին քվերակելու համար։

«Դուք ստեցիք, որ մենք հանել ենք տվել բացառապես Փաշինյանի անվան հիշատակումը․ ո՛չ, մեկ տեղ չէ, այլ մի քանի տեղից ենք հանել տվել, բայց ամենակարևորը՝ ավելացրել ենք արցախցիների վերադարձի իրավունքի հիշատակումը՝ Հանրապետականի և Րաֆիի Հովհաննիսյանի համատեղ ջանքերով։ Չասացիք ամբողջությամբ, որ այդ հայտարարության մեջ Արմեն Աշոտյանը վերահաստատվում էր որպես քաղբանտարկյալ»,– ասաց նա։

Մամիջանյանը նաև հարցրեց․ «Ամբողջի մասին խոսելիս ինչո՞ւ չասացիք, որ խաբեությամբ էիք հայտնվել, խաբել էիք մեր գործընկերներին, որ ձեզ դահլիճից հեռացրել են։ Խոսքը գնում է բանաձևի նիստի դահլիճի մասին»։