Մարտական հերթապահություն իրականացնող զինծառայողն օրական ստանում է մոտ 4000 դրամ․ ՊՆ փոխնախարար

ԱԺ «Հայաստան» խմբակցության պատգամավոր Գեղամ Մանուկյանն իր ելույթում հայտնել էր, որ պատգամավորները օրական ստանում են 22 հազար դրամ, պարեկը՝ 11 հազար դրամ, իսկ ձյանն ու անձրևին սահմանին հերթապահող զինծառայողը՝ 1700 դրամ։

ՊՆ փոխնախարար Արման Սարգսյանը հակադարձեց պատգամավորին՝ ասելով․ «Օրական 1700 դրամ աշխատավարձ հասկացողություն առհասարակ չունենք։ Մարտական հերթապահություն իրականացնող զինծառայողն օրական ստանում է մոտ 4000 դրամ, որի վրա ավելանում է հավելյալ գումար՝ ելնելով մարտական դիրքի վիճակից»,- ասաց Սարգսյանը։ Նա նաև խոսեց ատեստացիայի արդյունավետության մասին՝ հավելելով, որ դրա շնորհիվ, օրինակ, սերժանտի աշխատավարձը կարող է հասնել մինչև 670 հազար դրամի։

«Այս պահին հստակ կարող եմ ասել, 9,9 խմբի մեր ատեստավորված սերժանտի աշխատավարձը, որը կարող է նաև չունենալ բարձրագույն կրթություն, կազմելու է առնվազն 670 000 դրամ: Դրանից ներքև 9,8 խմբինը կազմում է  635 000 դրամ:

Մենք լավ ատեստավորված ամենացածր սերժանտի աշխատավարձը լինելու է մոտ 490 000 դրամ: Կարծում եմ՝ սա հրապուրիչ է, գրավիչ է, մենք սա կարող ենք հիրավի համարել որպես դրական մոտեցում թե սոցիալական վիճակի բարելավման իմաստով, և թե մեր զինված ուժերը պատրաստված սերժանտներով համալրելու իմաստով»,– ասաց նա: