Կհասկանանք իրական վնասի չափը, կփորձենք աջակցել. Պապոյանը՝ կարկուտից տուժած քաղաքացիների մասին

Մենք կանխարգելիչ միջոցառումներ էինք իրականացրել և նաև ինստիտուցիոնալ, մասնավորապես Կառավարության ֆինանսավորմամբ այս տարի 70-80 տոկոսով ապահովագրավճարները փոխհատուցվում են: Այս մասին, այսօր՝ մայիսի 7-ին, ԱԺ-ում հայտարարեց ՀՀ էկոնոմիկայի նախարար Գևորգ Պապոյանը՝ պատասխանելով պատգամավոր Գառնիկ Դանիելյանի՝ երեկ Արարատյան դաշտավայրում տեղացած ուժեղ կարկուտի հետևանքով ֆերմերների կրած վնասների փոխհատուցման վերաբերյալ հարցին:

«Ունենք բազմաթիվ քաղաքացիներ, որոնք օգտվել են այդ առաջարկից, և իրենք ընդամենը 20 տոկոսն են վճարելու ապահովագրավճարի, 80 տոկոսը ՀՀ կառավարությունն է փոխհատուցելու: Քաղաքացիների այդ խումբը որևէ խնդիր չունի և կփոխհատուցվի»,-ասաց նա:

Ինչ վերաբերում է այն քաղաքացիներին, որոնք կա՛մ չեն հասցրել, կա՛մ չեն ապահովագրել իրենց այգիները, նախարարն ասաց, որ նախորդ տարի նմանատիպ դեպք եղել է. «Բավական ծանր աշխատանք ունեցանք բանկային համակարգի հետ, և ըստ էության, բոլոր դեպքերը առանձին-առանձին դիտարկել ենք և փորձել ենք օգնել ձեր մատնանշած խնդիրը կարգավորելու համար, որովհետև դուք նշեցիք՝ վարկեր ունեն»,- տեղեկացրեց էկոնոմիկայի նախարարը:

Ինչ վերաբերում է Դանիելյանի հարցին՝ ինչու հակակարկտային կայանները բազմաթիվ տեղերում առկա չեն, բացի դրանից՝ եղածներն էլ պատշաճ չեն գործել, Պապոյանը պատասխանեց՝ ինքը չի կարող միանշանակ նման պնդում անել:

«Հակակարկտային կայանները գտնվում են Շրջակա միջավայրի նախարարության կառավարման տիրույթում, բայց ես երեկ խոսել եմ և՛ Արարատի մարզպետի, և՛ Արտաշատ համայնքի ղեկավարի հետ, և այո, մենք ունենք վնասներ, բայց նաև արձանագրվել է, որ ամբողջ գիշեր հակակարտային կայաններն ամբողջ ծավալով աշխատել են: Գիտականորեն ապացուցված փաստ է, որ հակակարտային կայանները մի կողմից բավական արդյունավետ են, բայց երբեք 100 տոկոսանոց արդյունավետություն չեն ունենում: Այնտեղ կան այլ գործիքներ, օրինակ՝ Վրաստանում հրթիռների տարբերակն է կիրառվում, բայց այնտեղ այլ հարցեր կան, որոնք այս պարագայում դեռևս մեզ մոտ կիրառման խնդիր ունենք»,- ասաց նախարարը:

Պապոյանի խոսքով՝ իրենք կգնահատեն վնասները, գործընթացը մեկնարկել է երեկվանից:

«Կհասկանանք իրական վնասի չափը: Կառավարության հնարավորությունների սահմաններում միշտ էլ մեր քաղաքացիների կողքին կանգնած ենք: Կփորձենք մեր հնարավորությունների սահմաններում վնասները գնահատելով աջակցել նրանց»,- նշեց նա: