Ոչ բոլոր սնկերն են ուտելի, զգոն եղեք. Առողջապահության նախարարություն

Սնկից թունավորումները հիմնականում առաջանում են սնկերը չտարբերակելու կամ դրանց ոչ ճիշտ մշակման հետևանքով, արդյունքում՝ թունավորում, ընդհուպ մահ։ Որոշ տեսակի սնկեր սննդում կարելի է օգտագործել միայն համապատասխան խոհարարական մշակումից հետո: Իսկ թունավոր սնկերը ոչ մի դեպքում չի կարելի օգտագործել, քանի որ դրանք պարունակում են այնպիսի թունավոր նյութեր, որոնք չեն ոչնչանում խոհարարական և արտադրական մշակման ժամանակ (եփել, չորացնել, սառեցնել, մարինացնել և այլն): Զգուշացնում են Առողջապահության նախարարությունից։

Սնկից թունավորումներից խուսափելու համար խորհուրդ է տրվում.

Սննդում չօգտագործել անհայտ ծագման սունկ:

Չհավաքել սունկ ճանապարհների եզրերից:

Ուտելու և թունավոր սունկը տարբերակելու համար հիմք չընդունել նկարները, քանի որ թունավոր սնկերը շատ հաճախ աճում են ուտելի սնկի մոտ և կարող են արտաքին տեսքով շատ նման լինել:

Ուտելու և թունավոր սունկը տարբերակելու համար հիմք չընդունել ժողովրդական մոտեցումները, ըստ որոնց` թունավոր սնկերին չեն մոտենում միջատները և այլ կենդանիները կամ եփելու ընթացքում արծաթը սևանում է և սևացնում է սնկային արգանակը:

Չուտել հում սունկ:

Երեխաների սննդում սունկ չներառել:

Խորհորդ չի տրվում ստամոքս-աղիքային համակարգի խնդիրներ ունեցող մարդկանց սննդում օգտագործել սունկ:

Սնկի հետ չօգտագործել ալկոհոլ, քանի որ այն ակտիվացնում է մի շարք թունավոր նյութեր:

Թարմ սունկը 1 օրից ավելի չպահել նույնիսկ սառնարանային պայմաններում:

Չզբաղվել ինքնաբուժմամբ:

Սնկից առաջացած թունավորումները ունենում են սուր ընթացք: Առաջին նշանները կարող են ի հայտ գալ 15 րոպեից մինչև 72 ժամ:

Կլինիկական հիմնական ախտանշաններն են`

որովայնի կտրուկ ցավը,

սրտխառնոցը, անընդհատ փսխումները,

գլխապտույտը, գլխացավը, գիտակցության կորուստը,

առատ քրտնարտադրությունը, թքահոսությունը, անհագ ծարավի զգացումը,

դեմքի կարմրությունը, սրտխփոցը, վախի զգացումը,

հալյուցինացիաները` առանց քնկոտության, լյարդի ախտահարման արդյունքում` մեծացած և ցավոտ լյարդը, դեղնուկը, լյարդային կոման, երիկամների ախտահարումը:

Հիշեցնենք, որ առաջին նշանների ի հայտ գալուն պես անմիջապես պետք է դիմել բժշկի: