Նորմալ է, որ Հովիկ Աղազարյանը և Հակոբ Ասլանյանն իմպիչմենտ են հայտարարել․ Ղազարյան

Քաղաքական գործիչ Էդգար Ղազարյանն այցելել էր ԱԺ՝ քաղաքացիների ընդունելության շրջանակներում հանդիպելու Տարածքային կառավարման, տեղական ինքնակառավարման, գյուղատնտեսության և շրջակա միջավայրի պահպանության հարցերի մշտական հանձնաժողով անդամների հետ։ Նա պատրաստվում էր քննարկել Նիկոլ Փաշինյանին անվստահություն հայտնելու վերաբերյալ հարցը։

Ղազարյանի ընդունելությանը հանձնաժողովից ներկա էր միայն «Հայաստան» խմբակցության պատգամավոր Արման Ղազարյանը։

«Ցավոք, այլ պատգամավորներ չկային, թեպետ ընդունելությունը նախատեսված էր հանձնաժողովի հետ։ Ես հարցեր ունեի հանձնաժողովի նախագահ Վահե Ղալումյանին, ով ընդգրկված է ՀՀ-ի և Արցախի ԱԺ-ների համագործակցության միջխորհրդարանական հանձնաժողովի կազմում։ Ինձ հետաքրքիր էր՝ պարոն Ղալումյանը վերջին անգամ ե՞րբ է մասնակցել այդ հանձնաժողովի նիստին, ի՞նչ հարցեր են քննարկվել, ո՞րն է եղել օրակարգը, նա փող է ստանում նաև այդ հանձնաժողովում աշխատելու համար»,- ասաց Ղազարյանը՝ հավելելով, որ իշխանական պատգամավորները ոչ թե վախեցել, այլ ուղղակի խուսափել են իր հետ շփումից, հարցադրումներից։

Անդրադառնալով իմպիչմենտի նախաձեռնությանը՝ նա նշեց․ «Մեր այս նախաձեռնությունն իմպիչմենտի՝ միտված է կատարելու այն, ինչ իրենք սահմանել են։ Այս կառավարության ծրագիրը ես չեմ գրել։ ՔՊ-ն է գրել, ՔՊ խմբակցությունը՝ հաստատել»,- նշեց Ղազարյանը։ Նա ընդգծեց՝ այս կառավարությունը ոչ միայն չի կատարում ծրագիրը, այլև՝ կատարում է  քայլեր, որոնք նախատեսված չէր ծրագրով, օրինակ՝ գրված չէ, որ պետք է հրաժեշտ տալ հին Հայաստանին և կառուցել իրական Հայաստան, որ պետք է փոխել Սահմանադրությունը, որ պետք է տարածքներ հանձնել։

«Այսինքն՝ այն, ինչ չկա՝ անում են Ալիևի պահանջով, այն, ինչ գրել են՝ չեն անում»,– հավելեց Ղազարյանը։

Էդգար Ղազարյանը նշեց, որ  իրենք վարչապետի թեկնածու առաջադրելու տրամադրություն չունեն, դա պատգամավորները պետք է իրականացնեն։ Ինչ վերաբերում է Հովիկ Աղազարյանի և Հակոբ Ասլանյանի հայտարարած իմպիչմենտին, Ղազարյանը նշեց, որ դա նորմալ է։