Երբ Ադրբեջանը Հայաստանից 200 քկմ օկուպացրեց, հասկացանք՝ դիվերսիֆիկացման հարց կա. Ռուբեն Ռուբինյան

Գրեթե 3 տասնամյակ Հայաստանի անվտանգությունը կախվածության մեջ էր միայն մեկ աղբյուրից՝ ՌԴ և նրա հետ կապված անվտանգային կառույցներ։ Այս մասին հայտնել է ՀՀ ԱԺ փոխնախագահ Ռուբեն Ռուբինյանը՝ Երևանում կայացած «Երևանի երկխոսություն» միջազգային համաժողովի պանելային քննարկման ժամանակ։

«Մենք կարծում էինք, որ դա բավարար էր ապահովելու ՀՀ անվտանգությունն ու տարածքային ամբողջականությունը, բայց հետագա իրադարձությունները ցույց տվեցին, որ անվտանգության միայն մեկ աղբյուր ունենալը պարզապես բավարար չէ, քանի որ երբ ժամանակը գալիս է, միջամտելու պարտավորություններ ստանձնած երկրները, կազմակերպությունները չեն միջամտում կամ չեն ցանկանում դա անել։ Որպես արդյունք ունեցանք էթնիկ զտումներ Լեռնային Ղարաբաղում, Ադրբեջանի կողմից ՀՀ ինքնիշխան տարածքի 200 քկմ օկուպացիա և ակնհայտ դարձավ, որ Հայաստանը պետք է դիվերսիֆիկացնի իր անվտանգային ռազմավարությունը»,- ասել է Ռուբեն Ռուբինյանը։

«Հայաստանը որդեգրել է բալանսավորման քաղաքականություն, ինչը նշանակում է, որ մենք ձգտում ենք, օրինակ, ԵՄ-ի, ԱՄՆ-ի, Ֆրանսիայի, Հնդկաստանի հետ սերտ հարաբերությունների, այդուհանդերձ, աշխարհագրությունը ճակատագիր է, և պետք է հաշվի առնել մեր անմիջական հարևաններին», հավելել է Ռուբինյանը։

«Մեր երկու հարևանների հետ կարգավորված հարաբերություններր չունենալը խաթարում է ողջ տարածաշրջանի հաղորդակցությունը, և մենք պատմական հնարավորություն ունենք ստորագրելու և վավերացնելու խաղաղության պայմանագիր Ադրբեջանի հետ, ինչը հնարավորություն կընձեռի ապաշրջափակել ողջ Հարավային Կովկասի հաղորդակցությունը»,- պարզաբանել է ԱԺ փոխնախագահը։