Պետականության նկատմամբ քամահրանքը հաղթահարված չէ. Փաշինյանի ելույթը

 Առաջին Հանրապետությունը մեզ 4.5 դար պետականազուրկ եղած ազգից կրկին վերածեց պետականակերտ ժողովրդի։ Սարդարապատի հուշահամալիրում Հանրապետության օրվա առթիվ իր ելույթում այս մասին հայտարարեց ՀՀ վարչապետ Նիկոլ Փաշինյանը։

«Մեր պատմության մեջ առաջին անգամ նախանշվեց պետական մի համակարգ` հանրապետություն, որտեղ իշխանության տերը Հայաստանի ժողովուրդն է, և նա է ընտրությունների միջոցով որոշում, թե ով, ինչպես պետք է կառավարի պետությունը։ Առաջին պետությունը թարմացրեց, սակայն չամրապնդեց պետականության մեր ընկալումը, սերմանեց, սակայն չարմատավորեց ժողովրդապետությունն ու ազատությունը մեզանում, որովհետև դրա ժամանակը չունեցավ»,– հայտարարեց նա։

Ըստ Փաշինյանի` Խորհրդային Միության գոյության ողջ ընթացքում Առաջին հանրապետությունը թիրախավորվեց որպես չարիք, ծաղրի ու արհամարհանքի առարկա դարձավ։

Նրա խոսքով, 1991 թվականին, երբ Հայաստանը կրկին անկախացավ, թվում էր` 70-ամյա պրոպագանդան խորը հետք չի թողել մեզանում, անկախ և ինքնուրույն լինելու մեր վախերը հաղթահարված են։ Մինչդեռ, ըստ նրա, 3-րդ հանրապետության պատմության հետահայաց վերլուծությունն ակնհայտ է դարձնում, որ պետականության նկատմամբ քամահրանքը, ինքնիշխանությունից ու ինքնուրույնությունից մեր վախերը լիարժեք հաղթահարված չեն։