Պարգև Օհանյան. «Դատավորը պետք է գոնե 5 տարվա ստաժ ունենա»

Այսօր մամուլում հայտնված լուրերի համաձայն` հոկտեմբերի 17-ին Սերժ Սարգսյանի հրամանագրով 11 նոր դատավորներ են նշանակվել:Դրանց մեջ կան հետաքրքիր եւ մեզանում հայտնի մարդկաց որդիների անուններ, օրինակ՝ Հեռուստատեսության և ռադիոյի ազգային հանձնաժողովի նախագահ Գրիգոր Ամալյանի որդին՝ Էդուարդ Ամալյանը, ՀՀ լեզվի տեսչության պետ Սերգո Երիցյանի որդին՝ Սարգիս Երիցյանը, և նախագահի թիկնազորի պետ Հրաչյա Հարությունյանի՝ «Կրակեմ Հրաչի» որդին՝ Դավիթ Հարությունյանը: Մի քանի գործող դատավորներ էլ ընդհանուր իրավասության դատարանից տեղափոխվել են վերաքննիչ ատյան: Այս հարցով զրուցեցինք նախկին դատավոր Պարգև Օհանյանի հետ, որն անդարադառնալով նորանշանակ դատավորներին, ասաց. «Ճիշտն ասած ես մարդու անձը, արժանիքները չեմ կապի ճանաչված հայր ունենալու փաստով: Իհարկե մեծապես գեները բերում են: Բացարձակ չեմ ուզում դրա հետ կապել, այլ հարց է, թէ ինչ արժանիքների համար են նրանք նշանակվել, որքանով են վաստակել այդ պատասխանատու պաշտոնը, որքանով արդարամիտ կլինեն իրենց էությամբ նախ, և հետո՝ ի պաշտոնե: Ես իրենց չեմ ճանաչում: Իսկ ինչ վերաբերում է ծնողներին, եթե օբյեկտիվ լինենք, մենք նրանց ծնողներին քննդատում ենք շատ առումներով, բայց նրանք գուցե լավ ծառայում են իշխանություններին, և իրենց պարտականությունները գուցե լավ են կատարում, այլ հարց է, որ մեր կարծիքով ոչ այնքան օբյեկտիվ են կամ մեծ չափով օբյեկտիվ չեն եղել: Այս հարցում, ըստ իս, մեծ նշանակություն ունի անձի վաստակը, կրթությունը և արդարամտությունը»:

Ըստ Օհանյանի, դատավոր լինելը առաքելություն է, գրեթե աստվածային առաքելություն, եւ առաջինը՝ դատավորը պետք է մարդ լինի: Օրինակ բերելով Համո Սահյանի խոսքերը՝ նախկին դատավորն ասաց. «Դատավորը պետք է լինի մորուքով: Բնական է, դա ասվել է փոխաբերական իմաստով, բայց ամեն դեպքում նա պետք է լինի հասուն, պատկառելի, հասարակության մեջ հարգանք վայելող, մեղադրողի հոգեբանություն չպետք է ունենա, այլ կարելի է ասել պաշտպանի: Իմ կարծիքով դատավորը պետք է գոնե 5 տարվա ստաժ ունենա, նոր միայն իրավունք ունենա դատավոր նշանակվի, բայց դեռ օրենքում էդպիսի սահմանափակում չկա», եզրափակեց նա: