Ռուսաստանը զանգվածաբար օգտագործում է քիմիական զենք Ուկրաինայում

Հոլանդիայի և Գերմանիայի հետախուզությունները հայտարարել են, որ հավաքել են ապացույցներ՝ կապված Ուկրաինայում Ռուսաստանի կողմից արգելված քիմիական զենքի լայնամասշտաբ կիրառման հետ։ Ըստ տվյալների՝ ռուսական անօդաչուները թունավոր գազեր են նետում խրամատներ՝ զինվորներին դուրս բերելու և հետո խոցելու նպատակով։ Հոլանդիայի պաշտպանության նախարար Ռուբեն Բրեկելմանսը կոչ է արել խստացնել պատժամիջոցները Ռուսաստանի նկատմամբ՝ ընդգծելով, որ քիմիական զենքի կիրառումը դարձել է «հաստատված ռազմավարություն»։

Հոլանդական հետախուզության ղեկավար Պիտեր Ռեսինկը հայտարարել է, որ սա պատահական գործողություն չէ, այլ «մեծածավալ ծրագիր», որն ընդգրկում է գիտնականների ներգրավում և զինծառայողների հրահանգավորում թունավոր նյութերի կիրառման համար։ Նրանց տվյալներով՝ Ռուսաստանը օգտագործում է նաև քլորոպիկրին՝ Առաջին համաշխարհայինից հայտնի շնչահեղձ գազ, որը հնարավոր է արձակել պարզ լամպերով կամ շշերով՝ անօդաչու թռչող սարքերից։

Ուկրաինան արձանագրել է քիմիական հարձակման ավելի քան 9000 դեպք, իսկ առողջապահական մարմինները հայտնել են 2500 վիրավորի մասին, որոնց մոտ արձանագրվել են քիմիական վնասվածքների ախտանիշներ։ Մինչ այժմ Քիմիական զենքի արգելման կազմակերպությունը (OPCW) չի սկսել պաշտոնական հետաքննություն, սակայն հնարավոր է, որ առաջիկայում հարցը բարձրացվի՝ նաև ԵՄ-ի նոր պատժամիջոցների փաթեթի շրջանակում։