Հայաստանում իշխող կառավարությունն այժմ որոշ թույլ կողմեր ունի․ Իրանի խորհրդարանի անդամ

Սյունիքի հնարավոր կորուստն ուղղակի սպառնալիք է մեր շահերին, ասել է Իրանի խորհրդարանի ազգային անվտանգության և արտաքին քաղաքականության հանձնաժողովի ներկայացուցիչ Էբրահիմ Ռեզաին։

«Հայաստանը մեր հարևանն է և մեր ռազմավարական գործընկերը։ Մենք միշտ լավագույն հարաբերություններն ենք ունեցել Հայաստանի հետ, անկախ նրանից, թե ինչ կառավարություն է իշխանության գլուխ եղել։ Ինչ-որ առումով, կարելի է ասել, որ այն դարպաս է Իրանի Իսլամական Հանրապետության և եվրոպական մայրցամաքի միջև»,– ասել է նա։

Անդրադառնալով այսպես կոչված «Զանգեզուրի միջանցքի» հետևանքով հնարավոր առաջանալիք սպառնալիքներին՝ Ռեզաին նշել է․«Մենք կկորցնենք մեր հարևաններից մեկին, և ըստ էության, տարածաշրջանի աշխարհաքաղաքականությունը կփոխվի, իսկ դա հակասում է մեր ազգային շահերին։ Մենք արդեն ունենք մեծ առևտրային ծավալներ Հայաստանի հետ, ունենք լավագույն հարաբերությունները և՛ կառավարության, և՛ Հայաստանի ժողովրդի հետ։ Մենք ունենք հայ հայրենակիցներ մեր սեփական երկրում, որոնք ինչ-որ կերպ այդ երկրի կողմնակիցներն ու աջակիցներն են։ Ինչո՞ւ պետք է կորցնենք մեր հարևաններից մեկին»։

Նրա խոսքով՝ Հայաստանում իշխող կառավարությունը որոշ թուլություններ ունի․ «Հայաստանում իշխող կառավարությունն այժմ որոշ թույլ կողմեր ունի, և մենք անցյալում տեսել ենք, որ այն բավարար ուժ չուներ այդ տարածքը պաշտպանելու համար: Հայաստանի դիրքորոշումը և մեր դիրքորոշումը մինչ օրս նույնն են և չեն փոխվել: Շատ երկրներ, նույնիսկ եվրոպական որոշ երկրներ, ինչպիսիք են Ֆրանսիան, որոնց հետ մենք այլ ոլորտներում հակասություններ ունենք, այս հարցում մեզ հետ նույն դիրքորոշումն ունեն»։

Ռեզաին նաև նշել է՝ Կովկասյան տարածաշրջանի խնդիրները պետք է լուծվեն տեղի երկրների կողմից, և այլ ուժերը չպետք է միջամտեն այս հարցերին: