Նեապոլի մոտակայքում գտնվող Կամպի Ֆլեգրեյում 4 մագնիտուդ ուժգնությամբ երկրաշարժ է տեղի ունեցել

Իտալական Նեապոլի նահանգի Ֆլեգրեյի դաշտերում գրանցվել է 4 մագնիտուդով ուժգնությամբ նոր երկրաշարժ։ Երկրաֆիզիկայի և հրաբխագիտության իտալական ազգային ինստիտուտը հայտնել է, որ դրա օջախը գտնվում է մեկ կիլոմետրից պակաս խորության վրա, իսկ էպիկենտրոնը՝ Պոցուոլի նավահանգստային քաղաքի մոտակայքում։ Այդ մասին տեղեկացնում է Euronews-ը։  

Օգոստոսի 31-ի կեսօրից ի վեր նշված տարածքում գրանցվել են մի շարք ցնցումներ (առնվազն 40), որոնցից 23-ը՝ կեսգիշերից հետո։ Դրանցից ամենաուժեղը գրանցվել է ժամը 04:55-ին։ Առաջին ցնցումներից հետո Նեապոլի պրեֆեկտ Միշելե Դի Բարին անցկացրել է օգնության համակարգման կենտրոնի նիստ և հաստատել է, որ զոհեր կամ գույքային վնասներ չկան։

Կամպի Ֆլեգրեյը, որը հայտնի է նաև որպես Ֆլեգրեյան դաշտեր, բարձր սեյսմիկ ակտիվության տարածք է, որտեղ վերջին տարիներին գրանցվել են բազմաթիվ ստորգետնյա ցնցումներ։ Այս տարածքում ապրում է մոտ կես միլիոն մարդ, ովքեր կարող են վտանգի տակ հայտնվել հրաբխի ժայթքման դեպքում: Հնարավոր են լավայի հոսքեր, որոնք կարող են ոչնչացնել մոտակա բնակավայրերը:

Երկրաֆիզիկայի և հրաբխագիտության ազգային ինստիտուտն իրականացնում է շարունակական մոնիթորինգ և պարբերաբար հրապարակում տվյալներ՝ անկանխատեսելի հանգամանքների դեպքում արագ արձագանքելու հնարավորություն ընձեռելով բնակիչներին։ ՏԻՄ իշխանությունները վստահեցնում են բնակչությանը, որ գիտնականների և արտակարգ իրավիճակների ծառայությունների հետ համատեղ մշակել են արտակարգ իրավիճակում գործողությունների հստակ ծրագիր։