Բրիտանիան խոստանում է նոր պատժամիջոցներ Ռուսաստանի դեմ

Մեծ Բրիտանիայի արտգործնախարար Դեյվիդ Լեմմին հայտարարել է, որ Լոնդոնը շուտով կներկայացնի Ռուսաստանի դեմ նոր սահմանափակումների փաթեթ։ Sky News-ի փոխանցմամբ՝ Լեմմին ընդգծել է, որ Բրիտանիան արդեն իսկ մասնակցում է «աշխարհի ամենախոշոր պատժամիջոցային ծրագրին» և անհրաժեշտ է համարել նավթի գների սահմանաչափի նվազեցումը։

Նախարարը հրաժարվել է բացահայտել ապագա քայլերի մանրամասները՝ նշելով, որ պաշտոնական հայտարարություն կլինի «շատ մոտ ապագայում»։ Լոնդոնը նախկինում հայտարարել էր, որ շարունակում է ընդլայնել ճնշումները Մոսկվայի վրա՝ Ուկրաինայում խաղաղ կարգավորման գործընթացին զուգահեռ։

Ավելի վաղ Բրիտանիայի պաշտպանության նախարար Ջոն Հիլին հայտնել էր, որ Լոնդոնը գնահատում է բանակի հնարավորություններն Ուկրաինայում ապագա անվտանգության երաշխիքների շրջանակում մասնակցելու համար։ Նա նշել է, որ Բրիտանիան և Ֆրանսիան մշակում են «կամավորների կոալիցիայի» ռազմական առաքելության ծրագիր։