Արբիտրաժը կարող է կայացնել այնպիսի որոշում, որը կատարման ենթակա չլինի կառավարության կողմից․ Գալյան

Արդարադատության նախարար Սրբուհի Գալյանին լրագրողները հարցին՝ ինչպե՞ս է Հայաստանն ապահովելու արդարադատության զգացումը միջազգային գործընկերների մոտ, եթե չի կատարում Ստոկհոլմի Արբիտրաժային դատարանի որոշումը ՀԷՑ-ի վերաբերյալ։

«Մեր երկրում գործում է արբիտրաժային ինստիտուտը, գործում է հաշտարարության ինստիտուտը, և, այո՛, կառավարությունը շարունակական ջանքեր է գործադրելու, որպեսզի այս ինստիտուտները հաջողեն՝ որպես վեճերի լուժման այլընտրանքային մեխանիզմներ։ Մենք ցանկանում ենք ունենալ լավ վիջավայր և վեճերի կանխատեսելի լուծում, որպեսզի շահագրգռենք բոլոր այն մարդկանց, ովքեր ներդրում են անելու կամ անում Հայաստանի Հանրապետությունում, գան, և անեն ի վերջո այդ ներդրումները։ Մեկ այլ նպատակ ևս ունենք՝ բեռնաթափել այն դատական ծանրաբեռնվածությունը, որ այս պահին գոյություն ունի»,– պատասխանեց նախարարը։

Նրա խոսքով՝ միջազգային արբիտրաժը կայացրել է միջանկյալ որոշում, ըստ էության, հայցի ապահովում կիրառելու մասին, որն այս պահին չի կատարվում կառավարության կողմից կամավոր տարբերակով և կա մեխանիզմ, որ դա կատարվի հարկադրաբար և կա մեխանիզմ դա չկատարելու, եթե դատարանները որոշեն, որ դա հակասում է հանրային կարգին: 

Գալյանը նշեց, որ կարող է լինել այնպիսի իրավիճակ, երբ արբիտրաժը կարող է կայացնել այնպիսի որոշում, որը կատարման ենթակա չլինի կառավարության կողմից։ «Ինչո՞ւ են ստեղծված այն կարգավորումները, որոնց հիման վրա արբիտրաժային որոշումները կարող են չկատարվել։

Ես չէի ուզենա շատ մեկնաբանել արբիտրաժային համապատասխան որոշումը, բայց այդ որոշումը վերաբերում է մեր օրենսդրական ակտին, որը կատարվել է Հայաստանի Հանրապետության կողմից: Այսինքն՝ Հայաստանի Հանրապետությունը գործել է օրենքի շրջանակներում, իսկ արբիտրաժային որոշմամբ սահմանվում է, որ մենք չպետք է կիրառենք մեր ներպետական օրենսդրությունը: Սա մեր պետությունն է, և մենք ասում ենք, որ մեր պետությունը իրավական է և պետք է հետևի իրավական կարգավորումներին, որոնք կան, գործող են և սահամանադրական են, քանի դեռ հակառակը չի հիմնավորվել և արբիտրաժային համապատասխան որոշումը հակասում է հենց դրան»,- ընդգծեց նախարարը: