Ի՞նչ է սխալ ասում Փաշինյանը, այո՛ , կառավարությունն ինքն է, նրան ընտրել է քաղաքացին. ՔՊ-ական պատգամավոր (տեսանյութ)

ԱԺ ՔՊ–ական պատգամավոր Էմմա Պալյանի կարծիքով՝ վարչապետ Նիկոլ Փաշինյանը՝ քաղաքական թիմի հետ միասին, իրական խաղաղություն է բերել և «դա այլևս իրականություն է»։

Անդրադառնալով Բաքվի՝ Հայաստանին ուղղված շարունակական պահանջներին՝ Պալյանը դիմեց լրագրողներին և նշեց․ «Իսկ դուք չեք տեսնո՞ւմ, որ սահմանում այսօր չկան կրակոցներ։ Ցանկացած բան հնարավոր է մեկնաբանել այնպես, ինչպես յուրաքանչյուրիս պետք է։ Բայց դրանից իրականությունը չի փոխվի ․․․ Դա է ինձ համար խաղաղությունը ու այդպես լինելու է միշտ»։

Իշխանական պատգամավորը նշեց, որ իրեն չի մտահոգում այն, որ վաշինգտոնյան համաձայնագրից հետո Թուրքիայի և Ադրբեջանի նախագահները շարունակում են կիրառել «Զանգեզուրի միջանցք» անվանումը․ «Չի մտահոգում, որովհետև ես գիտեմ՝ մեր քաղաքական թիմի առաջնորդի որդեգրած քաղաքականությունն այդ հարցի շուրջ և ես վստահ եմ, որ աշխարհը տեսնում է, որ ՀՀ–ն, անկախ ամեն ինչից, հավատարիմ է մնալու խաղաղության որգդեգրած սկզբունքներին և շարունակելու ենք մնալ, որոհետև այդպես է ուզում նաև ՀՀ քաղաքացին՝ անկախ մեր ընդդիմադիր գործընկերների պարբերաբար շահարկումներից»։

Պալյանը վստահություն հայտնեց, որ քաղաքացիները կիսում են իրենց կարծիքը խաղաղության հետ կապված և ՔՊ–ն առաջիկա ընտրություններին կստանա ընտրողների ձայների մեծամասնությունը․ «Ընդամենը 10 ամիս անց քաղաքացիները կգնան և իրենց քվեով կապացուցեն, որ ՀՀ քաղաքացին 2 ձեռքով կողմ է խաղաղությանը»,– ասաց նա, ապա պատասխանելով հարցին, թե արդյո՞ք անվերապահորեն հավատում է Ադրբեջանի նախագահի խոսքին, որ լինելու է խաղաղություն, ասաց․ «Ես անվերապահորեն հավատում եմ ՀՀ վարչապետի խոսքին։ Այդ վստահության հիմքում շատ կարևոր հանգամանքներ և աշխատանքներ են ընկած։ Ես տեսնում եմ մեր երկրի ղեկավարի ամենօրյա աշխատանքը»։

Անդրադառնալով Նիկոլ Փաշինյանի՝ «կառավարությունը ես եմ»  հայտարարությանը՝ նշեց․ «Ի՞նչն է սխալ ասում Նիկոլ Փաշինյանը։ Կառավարությունն ինքն է, այո՛, ում ընտրել է ՀՀ քաղաքացին»։