Հայտնաբերվել է ուղեղի ագրեսիվ քաղցկեղի զարգացման ռիսկը նվազեցնելու միջոց

ADAR1 կոչվող սպիտակուցի արգելափակումը կիսով չափ նվազեցնում է գլիոբլաստոմայի՝ ագրեսիվ ուղեղի ուռուցքի զարգացման ռիսկը։ Այս եզրակացությանն են հանգել Շվեյցարիայի Լոզանի համալսարանի գիտնականները։ Ուսումնասիրության արդյունքները հրապարակվել են Cell Reports ամսագրում։

Գլիոբլաստոման բնութագրվում է արագ աճով և կրկնվելու բարձր հակումով։ Առավել հաճախ այս տեսակի չարորակ ուռուցքը տեղայնացված է ուղեղի քունքային և ճակատային հատվածներում։ Ստանդարտ բուժումը ներառում է վիրահատություն, ճառագայթային թերապիա և/կամ քիմիաթերապիա տեմոզոլոմիդով։ Սակայն այս բուժումները շատ արդյունավետ չեն և ունեն կողմնակի ազդեցություններ։

Գիտնականներն իրենց առջև խնդիր են դրել գտնել քաղցկեղի բջիջներին ազդող և իմունային համակարգին ինքնուրույն ճանաչել դրանք սովորեցնող գլիոբլաստոմայի դեմ պայքարի միջոց։

«Մենք ցանկանում էինք պարզել, թե արդյոք ADAR1-ի՝ հակավիրուսային իմունիտետի մեջ սովորաբար ներգրավված սպիտակուցի արգելափակումը կազդի ուռուցքի աճի վրա։ «Մենք պարզեցինք, որ երբ ADAR1-ը արգելափակվում էր, մկների մոտ ուռուցքները ավելի դանդաղ էին աճում, և կրծողների կյանքի տևողությունը երկարում էր», - ասաց Լոզանի համալսարանի հետազոտող, դոկտոր Անխել Ալվարես-Պրադոն։

Գիտնականը բացատրեց, որ ADAR1 ակտիվության ճնշումը նվազեցնում էր քաղցկեղի բջիջների վերարտադրվելու ունակությունը։ Նմանատիպ ազդեցություն է ձեռք բերվել մարդու ուղեղի բջիջների վրա կատարված փորձերի ժամանակ։

Հետազոտողների հաշվարկների համաձայն, եթե նման մանիպուլյացիան ժամանակին իրականացվի, գլիոբլաստոմայի զարգացման ռիսկը կիսով չափ կնվազի։

«Մեր լաբորատորիան ներկայումս փնտրում և գնահատում է ADAR1-ի գործառույթը արգելափակող տարբեր դեղամիջոցներ։ Այնուհետև դրանք կարող են փորձարկվել կլինիկական փորձարկումներում, և կարող է մշակվել ավելի արդյունավետ թերապիա ուղեղի քաղցկեղի դեմ պայքարելու համար», - եզրակացրին գիտնականները։

Թարգմանությունը՝ Lurer.com-ի