ԱՄՆ գեներալը սպառնացել է Ռուսաստանին, Չինաստանին ու ԿԺԴՀ-ին՝ հայտարարելով «դռներ կոտրելու» պատրաստակամություն

ԱՄՆ Խաղաղօվկիանոսյան օդային հրամանատարության ղեկավար, գեներալ Քևին Շնայդերը հայտարարել է, որ ԱՄՆ Ռազմաօդային ուժերը պատրաստ են ցանկացած մարտահրավերի՝ ընդգծելով, որ կարող են «կոտրել դռներ» և ներթափանցել ցանկացած սահմանափակված մուտքի տարածք, այդ թվում՝ Ռուսաստանի, Չինաստանի և ԿԺԴՀ-ի։ Նրա խոսքով՝ Պենտագոնը մշտապես զարգացնում է իր կարողությունները՝ պահպանելով գերազանցությունը նոր սպառնալիքների նկատմամբ։

Շնայդերը նշել է, որ Պեկինի վերջին ռազմական շքերթը չի վախեցնում ԱՄՆ-ին, այլ ընդամենը լրացուցիչ ազդակ է, որ պետք է պատրաստ լինել։ Նա ընդգծել է, որ ԱՄՆ ռազմավարությունը ներառում է անսպասելի գործողությունների և հարձակողական տեխնոլոգիաների զարգացում՝ նորագույն սպառնալիքներին դիմակայելու համար։

Գեներալի խոսքով՝ առաջիկա գլխավոր զսպող գործոններից են B-21 ռազմավարական ռմբակոծիչը և վեցերորդ սերնդի F-47 կործանիչը, որոնք կաշխատեն անօդաչու հարվածային համակարգերի հետ միասին։ Պենտագոնը խոստանում է եզրակացություններ անել Չինաստանի ռազմական ցուցադրություններից՝ շարունակելով ամրապնդել իր տեխնոլոգիական գերակայությունը։