ԱՄՆ-ում ՀՀ նոր դեսպանի եղբայրը ձերբակալվել է․ MediaHub

Այս գիշեր Փարաքարում իսկական ամերիկյան մարտաֆիլմ է եղել. ձերբակալվել է Աշխատանքի և սոցիալական հարցերի նախկին նախարար, ԱՄՆ-ում դեսպան նշանակված Նարեկ Մկրտչյանի եղբայրը` Մկրտիչը, որի գրպանում եղել է փոքր պարկերով թմրանյութ: Այս մասին գրել է լրագրող Սյուզի Բադոյանը:

MediaHub-ը մանրամասներ է հայտնել սկանդալային միջադեպից․ «Այսպես, դեսպանի եղբոր մոտ պարեկները թմրանյութ են հայտնաբերել, նաև զենք։ Նա գիշերը եղել է 01 WM 808 պետհամարանիշի, Maserati մակնիշի մեքենայով, և երբ պարեկները կանգնեցրել են տվյալ մեքենան, Նարեկ Մկրտչյանի եղբայրը ծնկին դրած պայուսակը անմիջապես տվել է կողքի նստած տղամարդուն։ Երբ պարեկներն իջեցնում են մեքենայից ու սկսում խուզարկել, ուղևորը պայուսակը վերցնում ու փախչում է՝ ընթացքում ձեռքից գցելով այն։ Պարեկները վերցնում են պայուսակն ու ներսում զենք հայտնաբերում։ Իսկ Նարեկ Մկրտչյանի եղբոր գրպաններից էլ, ըստ նախնական տեղեկությունների, թմրանյութ են հայտնաբերում։

Մկրտիչ Մկրտչյանի եղբորը անմիջապես ձերբակալում են, իսկ կողքի ուղևորին դեռ փնտրում են»,– գրել է լրատվամիջոցը։

ՆԳՆ լրատվականից MediaHub-ին հայտնել են՝ տեղեկությունները ճշտում են, ավելի ուշ մանրամասներ կհաղորդեն։