«Վստահում եմ իրավապահ համակարգին»․ Արեն Մկրտչյանը՝ Նարեկ Մկրտչյանի եղբոր ձերբակալության մասին

Լոռու նորանշանակ մարզպետ Արեն Մկրտչյանն անդրադարձել է մամուլում տարածված տեղեկություններին, որ պարեկային ծառայության աշխատակիցները ձերբակալել են Աշխատանքի և սոցիալական հարցերի նախկին նախարար, ԱՄՆ-ում նորանշանակ դեսպան Նարեկ Մկրտչյանի եղբորը՝ Մկրտիչ Մկրտչյանին։

«Ինձ ոչինչ հայտնի չէ։ Գիտեմ այն, ինչ մամուլում տեսել եմ։ Բնականաբար, այս ժամանակահատվածում ուշադրությունս Լոռու մարզի վրա է կենտրոնացված եղել։ Վստահում եմ իրավապահ համակարգին, եթե կա խնդիր՝ կբացահայտվի, մեղավորները պատասխանատվության կենթարկվեն»,– նշել է նա։

Անդրադառնալով Նիկոլ Փաշինյանի՝ «Կառավարությունը ես եմ, եթե կա մեկը, ով իմ դիրքորոշմանը հակասող դիրքորոշում ունի՝ դիմումը գրի» հայտարարությանը՝ ՔՊ–ական նախկին պատգամավորը նշեց․ «Նիկոլ Փաշինյանի հետ կանգնել ենք նույն հարթակին հեղափոխությունից առաջ, եղել եմ վարչապետի օգնականը կոռուպցիայի դեմ պայքարի գծով հեղափոխությունից հետո, եղել եմ վարչապետի գլխավորած նախընտրական ցուցակում և նրա գլխավորած թիմում՝ ԱԺ պատգամավորի կարգավիճակում։ Ես շատ հստակ պատկերացնում եմ աշխատանքը»։

Հիշեցնենք՝ ԱՄՆ-ում ՀՀ նորանշանակ դեսպան Նարեկ Մկրտչյանի եղբոր՝ այս պահին ձերբակալված Մկրտիչ Մկրտչյանի դեմ հարուցվել է քրեական գործ Քրեական օրենսգրքի 3 հոդվածներով։

ՔԿ-ից Euromedia24.com–ին հայտնել են, որ քրեական վարույթը նախաձեռնվել է քրեական օրենսգրքի 335-րդ հոդվածի 1-ին մասով (հրազենի, դրա հիմնական բաղկացուցիչ մասերի, ռազմամթերքի և այլ նյութերի, սարքերի, առարկաների ապօրինի շրջանառությունը), 393-րդ հոդվածի 1-ին մասով (թմրամիջոցների, հոգեմետ (հոգեներգործուն) նյութերի, դրանց պատրաստուկների կամ դրանց համարժեք նյութերի (անալոգի) ապօրինի շրջանառությունն իրացնելու նպատակով կամ դրանք ապօրինի իրացնելը) և 396-րդ հոդվածի 1-ին մասով (թմրամիջոցների, հոգեմետ (հոգեներգործուն) նյութերի, դրանց պատրաստուկների կամ դրանց համարժեք նյութերի (անալոգի) կամ պրեկուրսորների ապօրինի շրջանառությունն առանց իրացնելու նպատակի)։

Մեկ անձ ձերբակալվել է։

Կատարվում է նախաքննություն։