«Վերևն Աստված կա, ոչ մի օգնող չունեմ, երեխա եմ պահում, չտանեք, ես իմ ապրանքը կհավաքեմ»․ առևտրական կինը հուզվեց

Երևանի քաղաքապետարանի հասարակական կարգի պահպանության վարչության աշխատակիցները շրջայցի ընթացքում ցանկանում էին առգրավել փողոցային առևտրով զբաղվող տարեց կնոջ ապրանքը։

«Մենք Ձեզ տեղ էինք չէ՞ հատկացրել»,– դիմելով առևտրական կնոջը՝ ասաց Երևանի քաղաքապետարանի աշխատակազմի հասարակական կարգի պահպանության ծառայության պետի պաշտոնակատար Ավետ Բաբայանը։

«Մեզ հատկացված տեղում մի բոմժ կեղտոտել էր ներքևը, լրիվ կեղտի մեջ։ Երեկ քաղաքապետի բաժնի պետը եկավ, տեսավ, ասաց՝ ձեզ ժամանակ ենք տալիս, մեկ–երկու օր համբերեք, մենք էս գիշեր կլվանանք, էդ մարդուն այդտեղից կտարհանենք, դուք կաշխատեք։ Էսօր եկել եմ, նույն վիճակն է։ Այս միրգն այնտեղ դնեմ, մարդիկ հետ կտան, մտնում են՝ քթները փակ դուրս են գալիս»,– հուզված աձագանքեց կինը։

Նա նշեց, որ հիվանդ երեխա է պահում, ապրում է վարձով․ «Ինձ ոչ մի օգնող չունեմ։ Վերևն Աստված կա, ուրիշ օգնող չունեմ, ապրելու ուրիշ տարբերակ չունեմ։ Եթե կարողանայի 3 օր տունը նստել, մեծ հաճույքով կնստեի»,– ասաց Աշխեն անունով կինը և նշեց, որ ինքն իր ապրանքը կհավաքի։

Բաբայանն իր հերթին ասաց, որ պատասխանատվությունը վերցնում է իր վրա և ապրանքը չի առգրավի․ «Բայց խնդրում եմ հենց այս պահին տեղափոխվեք։ Ես էլ խոստանում եմ՝ վարչական շրջանի ղեկավարին խնդրեմ՝ խնդրին շուտ լուծում տա»,– ասաց նա։