Չկա գոնե մի կինոթատրոն, որտեղ ֆիլմերը լիովին հայերեն ցուցադրվեն, այս հարցը լուծում չունի՞. Ռուբինյանը՝ նախարարին

ՀՀ ԱԺ փոխնախագահ Ռուբեն Ռուբինյանը խորհրդարանում հարց ուղղեց ԿԳՄՍ նախարար Ժաննա Անդրեասյանին՝ բարձրացնելով կինոթատրոններում ֆիլմերի հայերեն թարգմանության խնդիրը։

«Մեր անկախությունից անցել է 34 տարի, բայց կինոթատրոններում ֆիլմերը հիմնականում ցուցադրվում են ռուսերեն թարգմանությամբ։ Չկա գոնե մի կինոթատրոն, որտեղ ֆիլմերը լիովին հայերեն ցուցադրվեն։

Ես դեմ չեմ, թող որոշ ֆիլմեր լինեն ռուսերեն թարգմանությամբ ռուսալեզու քաղաքացիների համար, լավ, այս հարցը լուծում չունի՞»,-ասաց Ռուբինյանը։

Ժաննա Անդրեասյանը նշեց, որ դեռ 2021-ին ընդունված «Կինեմատոգրաֆիայի մասին» օրենքով նախատեսվել էր խնդրի կարգավորում, սակայն այն ուժի մեջ էր մտնելու միայն 2030 թվականից:

«Կարծում եմ՝ դա շատ ուշ է։ Առաջարկում ենք այդ պահանջը ուժի մեջ մտնի 2026 թ. հունվարից։ Տեխնոլոգիական լուծումները հնարավորություն են տալիս հեշտությամբ ապահովել հայերեն ենթագրերով ֆիլմերի ցուցադրումը, ինչը կարող է դառնալ օրենսդրական պահանջ»,-ասաց Անդրեասյանը։