ՖԻՖԱ-ն մտադիր է փոխել 11 մետրանոց հարվածի կանոնակարգը

Գերմանական Bild պարբերականի փոխանցմամբ՝ ՖԻՖԱ-ն նախատեսում է փոփոխություններ կատարել 11 մետրանոց հարվածի կանոնակարգում, որոնք ուժի մեջ կմտնեն հաջորդ մրցաշրջանից։ Այս մասին տեղեկանում ենք armsport.am կայքից։

Առաջարկվող փոփոխությունների համաձայն՝ եթե դարպասապահը հետ է մղում 11 մետրանոց հարվածը, ապա կնշանակվի հարված դարպասից՝ անկախ գնդակի անդրադարձից։ Ներկայումս տեղեկություններ չկան այն մասին, թե ինչպես են կարգավորվելու այն իրավիճակները, երբ գնդակը դիպչում է դարպասի ուղղահայաց կամ հորիզոնական ձողերին։

Նշվում է, որ այս կանոնն ուժի մեջ մտնելու համար պետք է հաստատվի Միջազգային ֆուտբոլային ասոցիացիաների խորհրդի (IFAB) կողմից, որը միակ մարմինն է, որն իրավասու է փոփոխություններ կատարել ֆուտբոլի կանոններում։

Եթե տարեկան ժողովում 11 մետրանոց հարվածների կանոնակարգի փոփոխությունների վերաբերյալ քվեարկությունը դրական արդյունք տա, նոր կանոնները կենթարկվեն գործնական փորձարկման՝ նախքան վերջնական ընդունումը։