«Տեղի ունեցածը հարցեր է բարձրացնում, որոնք ինձ էլ են անհանգստացրել»․ Փաշինյանը՝ Փարաքար համայնքի ղեկավարի սպանության մասին

Փարաքարում տեղի ունեցածը հարցեր է բարձրացնում, որոնք ինձ էլ են հետաքրքրել և անհանգստացրել։ Այս մասին լրագրողների հետ զրույցում ասաց վարչապետ Նիկոլ Փաշինյանն՝ անդրադառնալով Մերձավանում տեղի ունեցած կրակոցներին և Փարաքար խոշորացված համայնքի ղեկավարի սպանությանը:

Հարցին, թե արդյոք հետևություններ արվել են դեպքից, նա նշեց, որ տեսանելի է՝ պաշտոնանկություններ են եղել։

Փաշինյանը նշեց, որ Փարաքարում փետրվարին տեղի ունեցած իրադարձությունների ժամանակ զոհ է եղել, այդ գործով 14 մեղադրյալ կա, և դատավարություն է ընթանում․ «Բայց մեղադրայլների մի մասն ընդհանրապես կալանքի տակ չէ, մի մասն էլ տնային կալանքի տակ է, մի հոգի է, որ կալանքի տակ է։ Մյուս կողմից էլ անընդհատ քննարկում ենք, թե մեր բանտերն ինչքանով պետք է ծանրաբեռնված լինեն։ Դեպքեր ունենք, երբ որ հանցագործություն են կատարում մարդիկ, ովքեր այդ պահին ամբաստանյալի կարգավիճակում են դատարանում։ Մեր ոստիկանությունն էլ, քննչական մարմիններն էլ այդ հարցը հաճախ բարձրացնում են»,– ասաց վարչապետը։

Նա նշեց, որ պետք է հասկանալ՝ որ դեպքերում պետք է մարդկանց կալանքի տակ պահել, որ դեպքերում՝ այլընտրանքային խափանման միջոցներ կիրառել։ «Բայց առանցքում պետք է լինի ժողովրդավարությունը։ Որովհետև մյուս կողմից ասում են՝ բռնապետություն է, այս իշխանությունը մարդկանցով է լցնում բանտերը, մյուս կողմից էլ ասում են՝ ամենաթողություն է, ազատության մեջ են։ Սրանք լուրջ դիլեմաներ են»,– հավելեց Փաշինյանը։