Հայաստանի 14 քաղաքների և 49 համայնքների ջրամատակարարման խնդրի լուծման ծրագրի ժամկետը երկարացվել է

Կառավարությունն իր այսօրվա՝ հոկտեմբերի 2–ի նիստում հավանություն տվեց «Հայաստանի Հանրապետության և Եվրոպական ներդրումային բանկի միջև «Ջրային ոլորտի համայնքային ենթակառուցվածքներ» ֆինանսական պայմանագրի թիվ 3 փոփոխություն» նամակ-համաձայնագրին։

Ծրագրի ֆինանսական պայմանագիրը ստորագրվել է 2014թ.-ի հունիսի 24-ին, որով նախատեսվել է Հայաստանին տրամադրել 25.5 մլն եվրո վարկային միջոցներ, սակայն ժամանակի ընթացքում ՀՀ ֆինանսների նախարարության առաջարկով վարկային միջոցների շուրջ 8.8 մլն եվրոն չեղարկվել է՝ դառնալով շուրջ 16.66 մլն եվրո: Ֆինանսական պայմանագրի 2-րդ փոփոխությամբ վարկային միջոցների հասանելիության ժամկետը երկարաձգվել էր մինչև 2024 թվականի դեկտեմբերի 31-ը: Այս ընթացքում մասհանվել է 13.6 մլն եվրո, չմասհանված միջոցների ընդհանուր չափը կազմում է 3.06 մլն եվրո։

Վերոնշյալ փոփոխությամբ նախատեսվում է ԵՆԲ վարկային միջոցների վերջնական հասանելիության ժամկետը երկարաձգել մինչև 30.12.2025թ., Ծրագրի կատարումն ավարտել մինչև 31.12.2026թ., ինչպես նաև կատարել համապատասխան փոփոխություններ Ծրագրի իրականացմանն առնչվող տեղեկատվության և հաշվետվության ներկայացման վերջնաժամկետներում:

ԵՆԲ վարկային միջոցներով մասամբ  ֆինանսավորվում է «Համայնքային ենթակառուցվածքների II ծրագիր, փուլ 3 - Հայաստանի ջրամատակարարման և ջրահեռացման ենթակառուցվածք» ծրագիրը, որի շրջանակներում նախատեսվում է ՀՀ 7 մարզերի (Շիրակի, Լոռու, Արմավիրի, Գեղարքունիքի, Կոտայքի, Վայոց Ձորի և Սյունիքի մարզերի) 14 քաղաքների և 49 համայնքների ջրամատակարարման և ջրահեռացման համակարգերի բարելավման աշխատանքների իրականացում, ներառյալ՝ ծրագրի աշխարհագրությունն ընդգրկող մարզերի 13 համայնքներում նախատեսվող շուրջ 9.2 մլն եվրո ընդհանուր արժողությամբ հավելյալ շինարարական աշխատանքները։

Այս պահին իրականացման փուլում են շուրջ 35.1 մլն եվրո ընդհանուր արժողությամբ առկա երեք շինարարական պայմանագրերի շրջանակներում իրականացվող լայնածավալ շինարարական աշխատանքները՝ ավարտման շուրջ 93.5% ցուցանիշով։ Շինարարական աշխատանքներն ամբողջությամբ նախատեսվում է ավարտել 2025 թվականին։