Կիևը վերադարձրել է նաև 20 քաղաքացիական անձանց

Ռուսաստանի Պաշտպանության նախարարությունը հայտնել է, որ ռազմագերիների վերջին «185-ի դիմաց 185» փոխանակման շրջանակում Կիևը վերադարձրել է նաև 20 քաղաքացիական անձանց։

Վերադարձված զինծառայողներն ու քաղաքացիականները այժմ գտնվում են Բելառուսում, որտեղ նրանց ցուցաբերվում է բժշկական և հոգեբանական աջակցություն։ Մոտ ժամանակում նրանք կտեղափոխվեն Ռուսաստան՝ շարունակական բուժման և վերականգնման համար։

Նախարարությունը ընդգծել է, որ փոխանակումը կայացել է հուլիսի 23-ին Ստամբուլում ձեռք բերված պայմանավորվածությունների հիման վրա։ Ավելի վաղ հայտնի էր դարձել, որ սեպտեմբերի 26-ին նախատեսված՝ Կուրսկի մարզի բնակիչների վերադարձը չեղարկվել էր՝ առանց պատճառի բացահայտման։