Կանխատեվում է մոտ 28 մլրդ դրամով ավելացնել հիփոթեքի մասով եկամտահարկի հետվերադարձի չափաբաժինը. ՊԵԿ

«Որոշումը վերաբերում է հիփոթեքային վարկի վճարման տոկոսների գումարի վերադարձի միջոցառման գծով միջոցների ավելացմանը»,-Գործադիրինիստում ասաց ՊԵԿ նախագահ Էդուարդ Հակոբյանը՝ զեկուցելով 2025 թվականի պետական բյուջեում վերաբաշխում և փոփոխություններ կատարելու մասին որոշման նախագիծը։

Հիշեցնելով, որ 2025 թվականի հունվարի 1-ից ուժի մեջ են մտել հիփոթեքային վարկի տոկոսների մարմանն ուղղվող եկամտային հարկի վերադարձի համակարգի սահմանափակումները՝ ՊԵԿ նախագահը ասաց, թե այդ սահմանափակումները բերել են մի իրավիճակի, որ շահառուների թվաքանակը ավելացել է կտրուկ հատկապես 2024 թվականի վերջին, երբ որ արդեն պետական բյուջեն ընդունված էր։

«2024 թվականին մոտ 50 հազար շահառու ենք ունեցել։ Այս տարի արդեն՝ 62 հազար, այսինքն՝ 12 հազարով շահառուների թվաքանակը աճել է, և շահառուների թվաքանակի աճով պայմանավորված՝ տարվա ընթացքում անհրաժեշտություն է եղել գումարների միջեռամսյակային վերաբաշխումներ անել»,-հայտնեց Հակոբյանը:

Նրա խոսքով՝ 2025 թվականի բյուջեով 84 մլրդ է նախատեսված եղել, որից արդեն հունվար-սեպտեմբեր ամիսներին 70 մլրդ ծախսվել է, ինչն ավելի մեծ է, քան ամբողջ անցած տարվա ընթացքում ունեցած 69 մլրդը:

«Հիմա այս միտումները հաշվի առնելով՝ պատշաճ միջոցներ ունենալու և այս ծրագրից օգտվող մեր քաղաքացիներին պատշաճ աջակցելու համար անհրաժեշտություն կա ևս 12.6 մլրդ դրամով ավելացնելու մեր տարեկան ծրագիրը, որը առաջարկում ենք կատարել պետական բյուջեի առանձին ծրագրի խնայողությունների հաշվին։ Դրա արդյունքում տարվա վերջում կհասնենք մոտ 100 մլրդ դրամի, ավելի կոնկրետ՝ 97 մլրդ-ի: Դա նշանակում է, որ կանխատեվում է այս պահին մոտ 28 մլրդ դրամով ավելացում 2024 թվականի համեմատ: Նմանատիպ աճ երբևէ չի գրանցվել այս ծրագրի մեկնարկից ի վեր»,- ասաց ՊԵԿ նախագահը։