ՊԵԿ նախկին նախագահ Վարդան Հարությունյանի քրգործով նոր անձինք կկալանավորվեն (տեսանյութ)

Սամել Կարապետյանի ձերբակալությունից օրեր անց, ձերբակալված բարերարի ընկերոջ՝ «Գազպրոմ Արմենիայի» նախկին տնօրեն, Պետական եկամուտների կոմիտեի (ՊԵԿ) նախկին նախագահ Վարդան Հարությունյանի վերաբերյալ քննվող քրեական գործով նոր անձիք կկալանավորվեն։ Քրեական վարույթի շրջանակում ևս երեք անձի նկատմամբ հարուցվել է քրեական հետապնդում։

Euromedia24-ի տեղեկությունը պաշտոնապես հաստատեցին Հակակոռուպցիոն կոմիտեից՝ չհստակեցնելով, սակայն, ովքեր են նրանք՝ ՊԵԿ նախկին աշխատակիցնե՞ր, թե՞ գործարար խավից։

Նշենք, մեր աղբյուրի պնդմամբ, նոր մեղադրյալներից մեկը «Յուքոմ» ընկերության ներկայիս ֆինանսական փոխտնօրենն է։ Նրան անգամ բերման են ենթարկել, ինչի մասին չի հաղորդվել պաշտոնապես։ Սակայն մեր աղբյուրի պնդմամբ՝ սույն անձը ազատ է արձակվել դատարանից, նրա նկատմամբ խափանման միջոց է կիրառվել գրավը՝ 15 մլն դրամի չափով։

Հակակոռուպցիոն կոմիտեից Euromedia24-ին հայտնեցին, որ քրեական գործում ներգրավված երեք նոր անձանց «մեղադրանք է առաջադրվել խմբի կազմում փողերի լվացման, հակամրցակցային գործունեությանը օժանդակելու և ՀՀ Քրեական օրենսգրքով նախատեսված մի շարք այլ առերևույթ հանցանքների համար»։

Հիշեցնենք, ս.թ. օգոստոսի 8-ին կալանավորվեց ՊԵԿ նախկին նախագահ Վարդան Հարությունյանը՝ «Նորֆոլկ Քոնսալթինգ» ընկերությանը առնչվող քրեական վարույթի շրջանակներում։ Իրավապահները նրան մեղադրում են ձեռնարկատիրական գործունեությանը ապօրինի մասնակցելու, հակամրցակցային գործունեության և փողերի լվացման մեջ։

Միևնույն ժամանակ, Հարությունյանի գործի հիմքում դրված հանգամանքներով քննություն իրականացվել էր դեռևս 2018 թվականին, որի վերաբերյալ քրեական վարույթն այդ ժամանակ կարճվել էր։