WSJ․ ԱՄՆ-ը քննարկում է Ուկրաինային Barracuda հրթիռների մատակարարումը․ դրանց հեռահարությունը հասնում է մինչև Մոսկվա

ԱՄՆ-ը կարող է Ուկրաինային տրամադրել նոր տիպի Barracuda թևավոր հրթիռներ, գրում է The Wall Street Journal-ը՝ հղում անելով իր աղբյուրներին։ Վերջնական որոշում դեռ չի կայացվել, սակայն նշվում է, որ Barracuda ընտանիքի հրթիռները համեմատաբար էժան են և հեշտ արտադրելի՝ ունենալով 220-ից մինչև 930 կմ հեռահարություն, ինչը լուրջ սպառնալիք է ներկայացնում Ռուսաստանի համար։

Ամերիկյան Anduril ընկերությունը Barracuda հրթիռները ներկայացրել էր 2024-ի սեպտեմբերին՝ ընդգծելով դրանց «հեղափոխական» բնույթը՝ մատչելի գնի և արտադրության արագության շնորհիվ։ Մոդելներից ամենահզորը՝ Barracuda-500M-ը, կարող է հասնել Մոսկվա, Սանկտ Պետերբուրգ, ինչպես նաև ռուսական խոշոր քաղաքներ՝ Վոլգոգրադ, Նիժնի Նովգորոդ, Ուլյանովսկ, և անգամ սպառնալիք է ստեղծում Սարատովի մարզում գտնվող ռազմավարական ռակետակիրների բազայի համար։

Փորձագետները նշում են, որ հրթիռների մարտագլխիկը 15–45 կգ է, ինչը բավարար է կապի հանգույցներ, պահեստներ կամ էներգետիկ օբյեկտներ շարքից դուրս բերելու համար, սակայն ոչ՝ խոշոր կառույցներ ավերելու։ Barracuda-ի վտանգը հիմնականում պայմանավորված է զանգվածային արտադրության և լայն կիրառման հնարավորությամբ, ինչը թույլ կտա Կիևին համալրել իր հեռահար հարվածային ներուժը։