Բացահայտվել է Ռուսաստանի նոր սխեման՝ հարվածներ հասցնելու Ուկրաինայի էներգետիկ օբյեկտներին

Ռուսաստանի զինված ուժերը փոխել են հարվածների տակտիկան Ուկրաինայի էներգետիկ ենթակառուցվածքների դեմ։ Այս մասին հայտարարել է ավիացիայի գեներալ-մայոր Վլադիմիր Պոպովը՝ ընդգծելով, որ նախկինում նման ձևով չեն գործել էլեկտրամատակարարման համակարգի վրա։

Պոպովի խոսքով՝ հարվածները պետք է լինեն պարբերական՝ շաբաթը մեկ-երկու անգամ կամ մոտավորապես յուրաքանչյուր տաս օրը մեկ։ Նա նշել է, որ սա արվում է այն պատճառով, որ խաղաղ բանակցությունների առաջարկները անտեսվում են։ «Մեզ այլ ելք չի մնում, քան կիրառել նման հարվածներ»,— ասել է գեներալը՝ հավելելով, որ պետք է թույլ տալ հակառակորդին վերականգնել վնասված օբյեկտները, ապա կրկին հարվածել դրանց։

Նախօրեին Ռուսաստանի նախագահ Վլադիմիր Պուտինը հայտարարել էր, որ Մոսկվան պատրաստ է «հայելային պատասխան» տալ Ուկրաինայի զինված ուժերի կողմից Զապորոժյան ատոմակայանին հասցված հարվածներին՝ ակնարկելով հնարավոր սրացման և էներգետիկ ճգնաժամի խորացման մասին։