Երկու երկիր հետաքրքրված է Հայաստանում պղնձաձուլարանի կառուցմամբ. ՏԿԵ փոխնախարար

Իրանական ընկերությունը, ինչպես նաեւ Չինաստանը հետաքրքրված են Հայաստանում պղնձաձուլարանի կառուցմամբ։ Այս մասին հոկտեմբերի 3-ին «Հայաստանի հանքարդյունաբերություն 2025» ֆորումի ժամանակ լրագրողների հետ հարցազրույցում հայտնել է ՀՀ տարածքային կառավարման եւ ենթակառուցվածքների փոխնախարար Ասատուր Վարդանյանը։ Նա նշել է, որ հետաքրքրությունը մեծանում է, եւ ի հայտ կգան նոր խաղացողներ։

«Մենք ունենք պղնձաձուլարան կառուցելու ռազմավարություն։ Այս ուղղությամբ քայլեր են ձեռնարկվում, բայց գործարանը դեռեւս չի կառուցվում։ Անհրաժեշտ են լուրջ տնտեսական հաշվարկներ մեր առկա ռեսուրսները գնահատելու համար։ Ես կարծում եմ, որ մենք պղնձաձուլարան կունենանք նաեւ մեր ռեսուրսների ավելացման արդյունքում, որպեսզի կարողանանք բավարարել պահանջարկը»,- ընդգծել է Վարդանյանը։

Նա նշել է, որ գործարանի կառուցման ճանապարհին մի քանի խոչընդոտներ կան։

«Մեկն օտարերկրյա ներդրողների համար տեղեկատվության պակասն է, քանի որ նրանք Հայաստանի ֆոնդային շուկա մուտք չունեն։ Մենք ներկայում այս խնդիրը լուծում ենք թվայնացման միջոցով։

«Բացի այդ՝ միջազգային ներդրողների համար անհասկանալի հանքային հաշվետվությունների հնացած համակարգը նույնպես իր ազդեցությունն է ունենում։ Ահա թե ինչու մենք նախաձեռնեցինք ընկերության անդամակցությունը Ստանդարտների միջազգային կոմիտեին (CRIRSCO): Ես կարծում եմ, որ հաջորդ տարի այս ոլորտում դրական արդյունքների կհասնենք: Կարծում եմ՝ ազգային ստանդարտը պատրաստ կլինի հաջորդ տարվա վերջին»,- ասել է պաշտոնյան։