Apple-ը հեռացրել է ICE-ի հետևման հավելվածները՝ Թրամփի վարչակազմի ճնշումներից հետո

Apple-ը հայտարարել է, որ ICEBlock հավելվածը և նմանատիպ այլ ծրագրեր հեռացրել է App Store-ից՝ ԱՄՆ նախագահ Դոնալդ Թրամփի վարչակազմի պահանջով։ Այս հավելվածը տեղեկացնում էր օգտատերերին իրենց տարածքում գործող Միգրացիայի և մաքսային վերահսկողության ծառայության (ICE) գործակալների մասին, ինչը, ըստ ԱՄՆ արդարադատության նախարարության, կարող էր վտանգի տակ դնել իրավապահների անվտանգությունը։

ICEBlock-ի ստեղծողը՝ Տեխասում բնակվող Ջոշուա Աարոնը, քննադատել է Apple-ի որոշումը՝ նշելով, որ հավելվածը վտանգ չէր ներկայացնում գործակալների համար։ Սակայն ԱՄՆ գլխավոր դատախազ Պամ Բոնդին ընդգծել է, որ հավելվածը «դնում է ICE գործակալներին վտանգի տակ՝ պարզապես իրենց աշխատանքը կատարելու համար», և հավելել, որ ծրագիրը չի պաշտպանվում Սահմանադրությամբ։

Apple-ը 2024-ին հեռացրել է ավելի քան 82 հազար հավելված տարբեր պատճառներով, սակայն կառավարությունների պահանջով ջնջված հավելվածների մեծ մասը եղել է Չինաստանից, Ռուսաստանից և Հարավային Կորեայից։ ԱՄՆ-ից նման պահանջ գրեթե չէր եղել վերջին տարիներին, և այս դեպքը դարձել է բացառություն՝ առաջացնելով քննարկումներ տեխնոլոգիական հսկաների և Թրամփի վարչակազմի միջև կապերի շուրջ։