ԱՄՆ նախկին նախագահի օգնականը ներկայացրեց Ուկրաինայի համար հնարավոր խաղաղության մոդելը

ԱՄՆ նախագահի նախկին օգնական, Արտաքին հարաբերությունների խորհրդի ավագ գիտաշխատող Թոմաս Գրեմը ներկայացրել է Ուկրաինայի հակամարտության հնարավոր համաձայնագրի հիմնական բաղադրիչները։ ՌԲԿ-ի փոխանցմամբ՝ նա նշել է, որ մոդելը կարող է ներառել անվտանգության երաշխիքներ, Ռուսաստանի սառեցված ակտիվների ապաբլոկավորում, Ուկրաինայի վերականգնման կոմիտե և ՆԱՏՕ-ի չընդլայնման պայման՝ համաձայնեցված դաշինքի բոլոր անդամների հետ։

Գրեմի խոսքով՝ խնդիրը չի սահմանափակվում մեկ փաստաթղթի ստորագրումով, այլ վերաբերում է ընդհանուր եվրոպական անվտանգության համակարգին։ Նա առաջարկել է, որ Մոսկվան և Կիևը նախ սահմանեն կարգավորման հիմնական սկզբունքները, որոնց հիման վրա կսկսվեն բազմափուլ բանակցություններ։

Նրա խոսքով՝ բանակցությունների մեջ կներառվեն անվտանգության երաշխիքներ՝ «զինված նեյտրալիտետի» սկզբունքով, ՆԱՏՕ-ի դերը Եվրոպայում, տարածքային հարցերը, ռուսական ակտիվների ապաբլոկավորումը և Ուկրաինայի վերականգնումը, ինչպես նաև՝ երկրում ռուսալեզու բնակչության և Ուկրաինայի ուղղափառ եկեղեցու իրավունքների պահպանումը։