ԱՄՆ-ում կառավարության աշխատանքի կասեցումը հարվածել է ավիացիոն անվտանգության 60 հազար աշխատակցի

ԱՄՆ-ում արդեն երեք շաբաթ շարունակվող կառավարության աշխատանքի կասեցման պատճառով ավիացիոն անվտանգության ոլորտի շուրջ 60 հազար աշխատակիցներ մնացել են առանց աշխատավարձի։ Ինչպես հաղորդում է Reuters-ը, օդային երթևեկության վերահսկողներն ու Տրանսպորտային անվտանգության վարչության (TSA) աշխատողները ստիպված են դիմել խնայողությունների, վարկերի կամ լրացուցիչ աշխատանքի, որպեսզի հոգան ամենօրյա ծախսերը։

Շատ աշխատակիցներ վերջին վճարումները ստացել են կիսատ․ ոմանք՝ ընդամենը մի քանի դոլար։ Օրինակ, Մինեսոտայի TSA-ի ներկայացուցիչը հայտնել է, որ իր գործընկերը ստացել է ընդամենը 6,34 դոլար։ Մի քանի օդանավակայաններ, այդ թվում՝ Մինեապոլիս-Սեյնթ Փոլը, սկսել են կազմակերպել սննդի և առաջին անհրաժեշտության օգնության միջոցներ դաշնային ծառայողների համար։

Փաստացի ֆինանսավորման բացակայությունը սպառնում է նաև օդային երթևեկության անվտանգությանը, ինչպես դա եղավ 2019-ի կասեցման ժամանակ, երբ բազմաթիվ աշխատակիցներ բացակայում էին՝ չվճարվելու պատճառով։ Քաղաքական հակասությունների հետևանքով Կոնգրեսը դեռ չի կարողանում համաձայնության գալ բյուջեի շուրջ, իսկ հազարավոր ամերիկացիներ շարունակում են մնալ առանց եկամտի՝ «քաղաքական խաղերի» զոհ դարձած։