Հայրը խեղդամահ անելու ճանապարհով սպանել է 3-ամյա Տիգրանին. ՆԳ նախարար (տեսանյութ)

Երեկ հայտնաբերվել է 3-ամյա Տիգրանի մարմինը դաշտամիջյան հատվածում։ Ունենք նախնական տվյալներով՝ սպանություն։ Երեխայի հայրը խեղդամահ անելու ճանապարհով սպանել է փոքրիկին։  Այս մասին լրագրողների հետ զրույցում հայտնեց ՆԳ նախարար Արփինե Սարգսյանը։

«Այս վարկածը, ի թիվս այլնի, առաջին իսկ օրվանից եղել է մեր ուսումնասիրությունների շրջանակում։ Կհիշեք, որ եղբայրը, որն ունի որոշակի առողջական խնդիրներ, պարբերաբար ռեակցիաներ էր տալիս։ Ներգրավել էինք նաև համապատասխան մասնագետ, որպեսզի հոգեկան, առողջական վիճակի վրա լրացուցիչ ծանրաբեռնվածություն, որպես այդպիսին, չառաջանա, և մենք կարողանանք պատշաճ կերպով ստանալ տեղեկություն փոքրիկից, եթե նրան որևէ բան հայտի էր։ Նախնական տվյալներով՝ 2 եղբայրները դուրս են եկել տնից, հետո հորն են հանդիպել, և հայրը խեղդելու ճանապարհով սպանել է փոքրիկին։  Երեխայի հայրը նշել է, որ ներընտանեկան որոշակի հարցադրման շրջանակներում է վրա հասել դեպքը»,– մանրամասնել է ՆԳ նախարարը։

Սարգսյանը նաև հստակեցրել է, որ հայրը «երեխայի մարմնի տեղափոխություն է իրականացրել»։

Հիշեցնենք, որ նոյեմբերի 2-ին՝ ժամը 15-ի սահմաններում, Ծափաթաղ բնակավայրի հարակից դաշտամիջյան հատվածում, փրկարարները հայտնաբերել են հոկտեմբերի 27-ից որոնվող Տ․ Օ․- ի (ծնված 2022 թ․) դին։