Թրամփը կտրուկ է պատասխանել Binance կրիպտոարժույթային բորսայի հիմնադրի մասին հարցին

ԱՄՆ նախագահ Դոնալդ Թրամփը հերքել է, որ որևէ բան գիտի աշխարհի ամենամեծ կրիպտոարժույթային բորսայի՝ Binance-ի հիմնադիր Չանպեն Չժաոյի մասին։ Եվ այս ամենը՝ չնայած նրան, որ անցյալ ամիս անձամբ ստորագրել է նրա համար ներում շնորհելու մասին հրամանագիրը։ BBC-ի փոխանցմամբ՝ այս հարցը Թրամփին տրվել է CBS News-ի «60 րոպե» հաղորդման կիրակի օրը հեռարձակված հարցազրույցի ժամանակ։

Չժաոն, որը հայտնի է նաև որպես CZ, 2023 թվականին մեղավոր է ճանաչվել փողերի լվացմանը նպաստելու և դրան դրդելու մեջ։ Նա չորս ամիս անցկացրել է բանտում և համաձայնել է հրաժարվել Binance-ի՝ իր համահիմնադրած կրիպտոարժույթային բորսայի գործադիր տնօրենի պաշտոնից։

Չժաոյի այլ ընկերություններ համագործակցել են Թրամփի հետ կապված ընկերությունների հետ՝ նոր թվային արժույթի նախագծերի շուրջ, այդ թվում՝ Dominari Holdings-ի, որտեղ Թրամփի որդիները խորհրդատվական խորհրդում են, և ընկերությունը գրասենյակ ունի Trump Tower-ում։