Հռոմի կենտրոնում փլվել է պատմական աշտարակի մի մասը

Իտալիայի մայրաքաղաք Հռոմի կենտրոնում փլվել է Տորե Դեյ Կոնտի պատմական աշտարակի մի մասը։ Ինչպես հաղորդում է ANSA գործակալությունը, միջադեպը տեղի է ունեցել վերանորոգման ընթացքում։ Այդ պահին շինարարները գտնվում էին հենակետային կառուցվածքների վրա․ նրանցից մեկը՝ 64-ամյա տղամարդ, դուրս է բերվել փլատակների տակից և տեղափոխվել հիվանդանոց գլխի վնասվածքով, մեկ ուրիշը դեռ մնում է փլատակների տակ։

Դեպքի վայրում աշխատում են հրշեջների երեք խումբ, ինչպես նաև կարաբիներների ստորաբաժանումը, որը շրջափակել է տարածքը։ Հռոմի դատախազությունը արդեն սկսել է քննություն՝ պարզելու պատմական կառույցի փլուզման պատճառները։ Քննիչները նաև տեխնիկական փորձաքննություն կանցկացնեն վերականգնման աշխատանքների հնարավոր շարունակման համար։

Տորե Դեյ Կոնտի աշտարակը կառուցվել է 858 թվականին՝ Կոնտի ազնվական տոհմի կողմից, որի ներկայացուցիչներից չորսը դարձել են պապեր։ 1349 թվականի երկրաշարժից հետո շենքը վնասվել էր, և այսօր պահպանվել է միայն նրա ստորին հատվածը։