Հայաստանում տրվել է հեղինակային իրավունքի բարեփոխումների ծրագրի մեկնարկը

«Մտավոր սեփականության իրավունքի ոլորտում Եվրոպական միության փորձը եւ դրա տեղայնացումը Հայաստանում» խորագրող համաժողովը, որը հոկտեմբերի 19-ին տեղի ունեցավ Հայաստանում Ֆրանսիական համալսարանում, ԵՄ պատվիրակության կողմից ֆինանսավորվող եւ Ֆրանսիական համալսարանի կողմից իրականացվող դասախոսությունների շարքում երրորդ համաժողովն է:

ՀՀ-ում Եվրոմիության խորհրդատվական խմբի մտավոր սեփականության իրավունքի հարցերով ազգային փորձագետ Մարինե Ֆիդանյանը իր ելույթում անդրադարձավ հեղինակային իրավունքին, որը Մտավոր սեփականության իրավունքի ոլորտներից մեկն էը: «Հեղինակային իրավունքի սուբյեկտ են այն բոլոր գործերը, որոնք վերաբերվում են արվեստի եւ գրականության ստեղծագործություններին»,- նշեց նա:

Մ.Ֆիդանյանը հիշեցրեց, որ «Հեղինակային իրավունքի եւ հարակից իրավունքների մասին» ՀՀ օրենքը անկախության 20 տարիների ընթացքում երրորդ անգամ ընդունվել է 2006թ. հունիսի 15-ին: Հեղինակային իրավունքի խախտման դեպքում հեղինակը կարող է դիմել դատարան եւ ստանալ փոխհատուցում: Օրենքով ամրագրված են բացառություններ եւ սահմանափակումներ, երբ ուրիշի ստեղծագործությունը կարելի է օգտագործել առանց պատասխանատվության ենթարկվելու: «Դրանք են գիտական, հետազոտական նպատակով մեջբերումներ անելը, հրապարակային ելույթները, կրթական հաստատություններում օգտագործվող նյութերը»,- պարզաբանեց փորձագետը:

Համաժողովում ելույթ ունեցավ նաեւ ՀՀ-ում Եվրոմիության խորհրդատվական խմբի մտավոր սեփականության իրավունքի հարցերով միջազգային խորհրդատու Ալֆոնսո Կալլես Սանչեսը, ով ներկայացրեց ՀՀ-ի եւ ԵՄ-ի միջեւ տարբեր տարիների համագործակցությունը' առանձնացնելով 2010թ. Ասոցացման համաձայնագիրը: Տեղեկացնելով այն մասին, որ տրվել է հեղինակային իրավունքի բարեփոխումների ծրագրի մեկնարկը, նա նշեց, որ դրա համար առաջին հերթին անհրաժեշտ է ՀՀ Ոստիկանության համապատասխան բաժնի եւ Մաքսային ոլորտի անթերի աշխատանքը: Խոսելով Արդյունաբերական սեփականության իրավունքի մասին, խորհրդատուն նշեց. «Հայաստանը ավելի շատ ներմուծող երկիր է, եւ շատ կարեւոր է մաքսային ոլորտի զարգացումը, որպեսզի հնարավոր լինի խուսափել անորակ ու կեղծ արտադրանքի ներմուծումից»:

Մ.Ֆիդանյանի խոսքերով, մաքսային ոլորտի եւ ոստիկանության համապատասխան բաժնի ճիշտ աշխատանքի դեպքում հնարավոր կլինի բացառել նաեւ հայ արվեստագետների արտահոսքը, ինչպես նաեւ հնարավորություն կստեղծվի բարձրացնել Հայաստանի հանդեպ միջազգային հանրության վստահությունը: