Google քարտեզի վրա հայտնվել է Պաղեստին պետությունը

Google ինտերնետ հսկան իր «Քարտեզներ» բաժնի պաղեստինյան տարբերակի համար «Պաղեստինյան տարածքներ» արտահայտությունը փոխարինել է «Պաղեստին» եզրով: Այս գրությունը, որը տարբերում է պաղեստինական տարբերակը մյուսներից, տեղակայվել է www.google.ps էջում ընկերության լոգոտիպի նշանի տակ. գրում է BBC-ն: 

Հարցը, թե ինչպես անվանել Պաղեստինի ինքնավարությունը, որն անմիջականորեն կապված է նրա քաղաքական կարգավիճակի հետ, մինչ օրս սուր վեճերի առարկա է մնում: 

2012թ. նոյեմբերին ՄԱԿ-ը բարձրացրեց Պաղեստինի ինքնավարության կարգավիճակը մինչև դիտորդ-պետության կարգավիճակի, որից հետո Պաղեստինյան ինքնավարության նախագահ Մահմուդ Աբբասը հանդիսավոր կերպով հայտարարեց, որ պաղեստինցիներն այժմ պետություն ունեն:

Իսրայելը ՄԱԿ-ի այդ որոշումը քաղաքական թատրոն անվանեց և հայտարարեց, որ դրան ի պատասխան` ինքը ընդլայնելու է հրեական բնակավայրերի կառուցումը Հորդանան գետի արևմտյան ափին: