Մեկ դատավոր կալանավորվեց, մյուսի գործը դեռ քննվում է

Երևանի ընդհանուր իրավասության դատարանը բավարարել է ՀՀ սնանկության դատարանի դատավոր Գևորգ Նարինյանի նկատմամբ կալանքը երկամսյա խափանման միջոց ընտրելու՝ դատախազի միջնորդությունը:

Այս պահին դատարանը՝ դատավոր Աննա Մաթեւոսյանի նախագահությամբ, քննում է նույն դատարանի դատավոր Արա Կուբանյանին կալանավորելու՝ նախաքննական մարմնի միջնորդությունը։

Գևորգ Նարինյանի փաստաբան Մհեր Հակոբյանը ԼՈՒՐԵՐ.com-ի հետ զրույցում նշեց, որ քրեական գործի հետ կապված դեռ նախաքննություն է ընթանում. «Չեմ կարող ինչ-որ տեղեկություններ տրամադրել, երբ հրապարակվի քրգործը՝ մենք էլ մեր հերթին կմեկնաբանենք»,- ասաց փաստաբանը:

Հակոբյանից հետաքրքրվեցինք, թե պաշտոնական հայտարարությունը երբ կլինի. «Դա պետք է խորհրդակցենք մեր վստահորդի հետ, երբ թույլատրեց՝ այդ ժամանակ էլ կներկայացնենք»:

Երեկ տեղեկություն տարածվեց նաև, որ դատավոր Գևորգ Նարինյանը երակները կտրելու միջոցով փորձել է ինքնասպանություն գործել։ Այս լուրը ևս փաստաբանը չցանկացավ մեկնաբանել. «Դրա հետ կապված էլ մեկնաբանություններ կտա պարոն Նարինյանը, ես լիազորված չեմ, դա իմ վստահորդի բժշկական գաղտնիքն է»,- եզրափակեց նա:

Արփինե Հակոբյան