Հաղթել Փաշինյանին լեզվակռվո՞ւմ. Aravot.am

Իմ բազմաթիվ իրական եւ հնարովի մեղքերի շարքում կա մի մեղադրանք, որը ես մասամբ ընդունում եմ՝ ես քաղաքականությանը մոտենում եմ «սպիտակ ձեռնոցներով»: Այսինքն՝ չեմ հասկանում, թե քաղաքականությունն ինչպիսի կեղտոտ բան է եւ փորձում եմ այն մեկնաբանել՝ կիրառելով ինչ-որ անհասկանալի չափանիշներ: Մեղադրանքն, ինչ խոսք, միանգամայն ճիշտ կլիներ, եթե ես մասնակցեի քաղաքական պայքարին, քարոզեի որեւէ մեկի օգտին, կամ՝ նույնիսկ եթե քաղաքականության ներկայիս գործող անձանցից/կուսակցություններից որեւէ մեկի նկատմամբ ունենայի որոշակի համակրանք: Բայց քանի որ այդ ամենը չկա, ապա թույլ տվեք ես մնամ իմ «իդեալական աշխարհում»: Այդ աշխարհում կա մի հատկություն, որը բնութագրվում է ռուսերեն մի շատ հաջող բառով՝ «брезгливость» («զզվանքն» ամբողջությամբ չի արտահայտում իմաստը): Վերջերս «Տավուշը հանուն հայրենիքի» շարժման առաջնորդ Բագրատ արքեպիսկոպոս Գալստանյանը, պատասխանելով իշխանամետ գործիչներից մեկի կոշտ եւ, ընդունենք, էթիկայից դուրս գտնվող մեղադրանքներին, նրան բնութագրել է որպես մի մարդ, որն «ամեն առաջարկողի հետ բաղնիք է գնում»: Այդպիսի արտահայտություն ես չէի ցանկանա լսել ոչ միայն հոգեւորականից, այլեւ հասարակական, քաղաքական գործչից, հրապարակախոսից, լրագրողից: Նույնիսկ բլոգերից եւ ֆեյսբուքյան «ստատուսագրից»:

Դա տիպիկ փաշինյանական ոճ է՝ քաղաքական բանավեճը տեղափոխել անձնական կոմպրոմատների դաշտ՝ «հաղթահարելով» բոլոր տեսակի բարոյական արգելակները: Այդպես է վարվում վարչապետը խորհրդարանում եւ խորհրդարանից դուրս, այդպիսի վարք են դրսեւորում նաեւ կարկառուն ՔՊ-ականները: Չեմ պատկերացնում, թե ով է կարող «հաղթել» Փաշինյանին՝ լեզվակռվի նման ոճը կիրառելով: Թերեւս՝ միայն ԱՄՆ-ում բնակվող Վարդան Ղուկասյանը: Բայց, Հայաստանից հեռու ապրելով, նա չի կարող ամբողջական մասնակցություն ունենալ մեր երկրի քաղաքականությանը: …Չեսթերթոնն ասում էր՝ «ես տանել չեմ կարող վիճաբանությունը (argument), որովհետեւ այն միշտ ընդհատում է բանավեճը (discussion)»: Այլ կերպ ասած՝ երբ սկսվում է լեզվակռիվը, դրանով բանավեճն ավարտվում է: …Ենթադրենք, Հայաստանում հայտնվում է ընդդիմադիր, որը կարողանում է Փաշինյանի ոճով ու նրանից ավելի լավ «չոտկել», «շամփրել», «պորտը տեղը դնել» ցանկացած իշխանավորի (չնայած, կրկնեմ, դրան դժվար եմ հավատում): Ենթադրենք նաեւ, որ նա դառնում է զանգվածների սիրելին եւ հարյուր հազարավոր մարդիկ «մեռնում են նրա դուխին»: Շարունակելով ենթադրությունները՝ ընդունենք, որ նա լեզվակռվի իր տաղանդների շնորհիվ դառնում է «թագավոր»: Ասացեք խնդրեմ, ինչի՞ համար է մեզ պետք երկրորդ Փաշինյանը:

Արամ ԱԲՐԱՀԱՄՅԱՆ

Լուսանկարն արված է 2018-ի սեպտեմբերին «Իմ քայլը՝ հանուն Տավուշի» ներդրումային համաժողովից հետո

Այս թեմայով Շիրակի մարզպետարանի կրթության վարչության պետի հետ ձերբակալվածներից մեկը կին է․ մանրամասներ․ Aravot.am Նեթանյահուն հայտարարել է, որ «լսում է» պատանդների հարազատների ճիչն ու խոստացել է հաղթել պատերազմում Ադրբեջանի ԱԳՆ-ն պատասխանել է Փաշինյանին «Հրապարակ». Դեսպաններից ոմանք քծնել են Փաշինյանին Ալեքսանդր Պետրակովը մեկ խնդիր ունի Ազգերի լիգայի նոր մրցափուլում` հաղթել Արայիկ Հարությունյանն իր բոլոր քայլերի, նաև՝ հրաժարականի մասին տեղեկացրել է Հայաստանի իշխանություններին, այդ թվում՝ Նիկոլ Փաշինյանին. Աշոտ Ղուլյան Մարությանի ղեկավարած «Ազգային առաջընթաց» խմբակցության նվերը Փաշինյանին Ըմբշամարտի Մ20 ԱԱ. Աշոտ Խաչատրյանը հաղթել է ադրբեջանցի մրցակցին և դուրս եկել եզրափակիչ Երիտասարդական ԱԱ. Յուրիկ Հովեյանը հաղթել է թուրք ըմբիշին և դարձել բրոնզե մեդալակիր Ըմբիշ Աշոտ Խաչատրյանը հաղթել է ադրբեջանցի մրցակցին և դուրս եկել աշխարհի առաջնության եզրափակիչ փուլ