Էքս-Ան-Պրովանս քաղաքի պատվիրակությունն այցելեց Մասիս

Այսօր Մասիս համայնք այցելեց «Պրովանս-Ալպեր-Կոտ դ'Ազուր» ռեգիոնի փոխնախագահ, Էքս-ան-Պրովանս քաղաքի քաղաքապետ Սոֆի Ժուասենը` բազմակուսակցական սկզբունքով կազմված պատվիրակության ուղեկցությամբ։

 

Պատվիրակության անդամները հյուրընկալվեցին Մասիսի համայնքապետարանում։

Ողջունելով հյուրերին` Մասիսի համայնքապետ Դավիթ Համբարձումյանը շնորհակալություն հայտնեց քույր քաղաքի ներկայացուցիչներին և նշեց, որ այս այցը ոչ միայն ճանաչողական է, այլև կստեղծվեն նոր նախադրյալներ՝ սերտացնելու արդեն իսկ ձևավորված համագործակցությունը:

 

Սոֆի Ժուասենը շնորհակալություն հայտնեց ջերմ ընդունելության համար և տեղեկացրեց, որ պատվիրակության Հայաստան այցի նպատակն է համերաշխություն հայտնել հայ ժողովրդին, ինչպես նաև խորացնել հայ-ֆրանսիական ապակենտրոնացված համագործակցությունը` նոր խթան հաղորդելով Մասիս համայնքի հետ մեկնարկած քույրացման գործընթացին։

 

Ջերմ ու բարեկամական զրույցի ընթացքում քննարկվեցին նաև առաջիկա ծրագրերի հետ կապված որոշ հարցեր։

 

Հյուրերը մասնակցեցին նաև Մասիսի համայնքապետարանի 5-րդ հարկում կառուցված նորաոճ դահլիճի բացման արարողությանը, որն այսուհետ կոչվելու է «Էքս-ան-Պրովանսի անվան երիտասարդական կենտրոն»։

 

Պատվիրակության անդամները սիրով այցելեցին նաև Մասիս համայնքից Արցախյան պատերազմներում զոհվածների հիշատակը հավերժացնող պանթեոն, որին հարակից տարածքում Էքս-ան-Պրովանսի քաղաքապետ Սոֆի Ժուասենը եղևնի տնկեց՝ ի հիշատակ անմահացած հերոսների։

 

Այնուհետ հյուրերը շրջեցին Ֆրանկոֆոնիայի զբոսայգում։

Գերհագեցած օրն ամփոփվեց Մասիսում հանգրվանած արցախցիների հետ հանդիպումով ու ջերմ զրույցով։