Հավատո՞ւմ է գյուղվարչության պետը քահանաների՝ կարկտահարության դեմ ուղղված աղոթքներին

3 օր առաջ տեղած կարկտահարությունից տուժել էին նաև Շիրակի մարզի թվով 16 գյուղեր՝ Ամասիայի տարածաշրջանի Արեգնադեմ, Բանդիվան, Հովունի, Հովտուն, Աշոցքի տարածաշրջանի Ցողամարգ, Թորոսգյուղ, Գոգհովիտ, Լեռնագյուղ, ինչպես նաև Անիի տարածաշրջանի Սառնաղբյուր և Ձիթհանքով համայնքները:

Շիրակի մարզպետարանի գյուղվարչության պետ Մովսես Մանուկյանի ասելով, թեև կարկտահարության ծավալը մեծ է եղել, սակայն վնասի չափը, ըստ ակնադիտական դիտարկումների, մեծ չէ, համենայնդեպս, չի կարելի ասել, թե բերք չի սպասվում: Շատ համայնքներում, ըստ գյուղվարչության պետի, վնասը մոտենում է 20-30 տոկոսի: Այսինքն, մեր զրուցակցի փաստմամբ, վնասներն այնպիսին չեն, որ շիրակցիներն արմավիրցիների նման ոտքի կանգնեն ու ճանապարհներ փակեն: Մովսես Մանուկյանի հավաստմամբ, թվարկված համայնքներից ոչ մեկում չկան հակակարկտային կայանքներ, մարզի միայն 17 համայնքներ են պաշտպանված կարկուտից, որտեղ տեղադրված են 41 հակակարկտային կայանքներ: Պաշտոնյայի փաստելով, Շիրակի մարզի հակակարկտայինները փչացած չեն, 100 տոկոսով՝ անխափան աշխատում են:

Aravot.am-ը մարզպետարանի պաշտոնյայից հետաքրքվեց, թե քահանայի հաստիքը դեռ գործո՞ւմ է գյուղնախարարությունում, որի պարտականություն էր աղոթքի միջոցով բերքը փրկել կարկտահարությունից ու այլ բնական աղետներից:

Ի դեպ, մենք գյուղվարչության պետին նաև հիշեցրեցինք, որ այս հարցը գյուղնախարարին ուղղելիս, Սերգո Կարապետյանը շատ վատ է զգում իրեն, ու այնպես է հուզվում, որ քրիստոնյա դառնալու ու աղոթք անելու առաջարկ է անում հարցը տվող լրագրողին:

«Ցավոք սրտի, նման հարցադրում էլի է եղել մի քանի տարի առաջ, խնդիրը դրանում չէ, բոլորս էլ աստվածավախ մարդիկ ենք, բոլորս էլ հավատում ենք , բայց էսօր գիտական միտքը հասել է այն աստիճանի, որ ստեղծված բոլոր տեխնոլոգիաներով մարդկությունը կարող է պաշտպանել իր աճեցրած բերքը, կարող է պայքարել բնության օրենքների, բնության արհավիրքների դեմ:

Այսօր մեր մարզում և հանրապետությունում, ինչպես և աշխարհում կա գիտական միտք, որը ստեղծել է հակակարկտային կայանքներ, ռադիոլոկացիոն ցանց, որը կարողանում է պայքարել կարկտաբեր ամպերի, բնական արհավիրքների դեմ: Երկրաշարժի դեմ ամուր շենքեր կառուցելով նույնպես պաշտպանվում ես, բայց ասյօր գյուղատնտեսության ոլորտում մշակաբույսերի ապահովության համար գիտությունը հասել է այն մակարդակին, որ ինչ խոսք, եթե օրինակ Շիրակի մարզում տեղադրվի ռադիոլոկացիոն ցանց, ապա հարցը կլուծվի», -ասաց «Առավոտ»–ի զրուցակիցը:

Գյուղվարչության պետի համոզմամբ, պետությունը անպայման պետք է ստեղծի ապահովագրություն գյուղատնտեսության ոլորտում, բայց քանի գյուղատնտեսությունը ցածր եկամտաբեր ճյուղ է, այստեղ փողեր ներդնելը դառնում է ռիսկային: Այդ պատճառով պաշտոնյան առաջարկում է Շիրակի մարզում տեղադրել ռադիոլոկացիոն ցանց և 500 հակակարկտային կայանքներ ու Հայաստանի բոլոր ավահովագրողները միանգամից, շտապ կտեղափոխվեն Շիրակի մարզ: Իսկ սա կլինի գյուղատնտեսության իրական զարգացումը: