Պետրոս Մակեյանը կդիմի Եվրադատրան

Հայ ազգային կոնգրեսի մաս կազմող «Ժողովրդավարական հայրենիք» կուսակցությունը Երեւանի Վաղարշյան 12 հասցեում գտնվող տարածքը զբաղեցնում է 1996 թվականից։

2011–ի ապրիլի 1-ին լրացել է գրասենյակի տարածքի վարձակալության ժամկետը և կուսակցությունը մտադիր է եղել սովորականի պես պայմանագիրը երկարաձգել։ Սակայն մարտի 31-ին կուսակցության ղեկավար Պետրոս Մակեյանը ստացել է գրություն, որով կառավարությանն առընթեր Պետական գույքի կառավարման վարչությունը տեղեկացրել է, թե «նպատակահարմար չի համարում կուսակցության հետ կնքված վարձակալության պայմանագրի վերակնքումը»։

Կուսակցությունն ի սկզբանե վարձակալությամբ զբաղեցրել է շենքի տարածքի 315 քառակուսի մետրը։ Սակայն 2008-ի ամռանը, երբ հետընտրական իրադարձությունների առնչությամբ Պետրոս Մակեյանը կալանավորված էր, կառավարությունը դատական կարգով վերցրել է տարածքի մեծ մասը՝ 240 քառակուսի մետրը, հետագայում կուսակցությունը զրկվել է եւս 30 քառակուսի մետր տարածքից, իսկ այժմ էլ Պետական գույքի կառավարման վարչությունը պահանջում է վերջնականապես ազատել ամբողջ տարածքը։

ԼՈՒՐԵՐ.com–ի այն հարցին, թե արդյոք կուսակցությունում չեն պատրաստվում իրենց իրավունքները վերականգնել դատարանում,  Պետրոս Մակեյանը նշեց, որ իրենք դիմել են Դատական ակտերի հարկադիր կատարման (ԴԱՀԿ) ծառայությանը, որպեսզի Պետգույքի կառավարման վարչությունից հետ վերցնի իրենց պահանջած 75քմ տարածքը, սակայն իրենք հրաժարվել են կատարել այդ պահանջը։

«Այդ պահանջը չկատարելու փաստով փետրվարի 13–ին հերթական դատական նիստն է տեղի ունենալու։ Մենք մի քանի ճակատով ենք աշխատում, իսկ վաղն էլ դիմելու ենք Եվրադատարան», – նշեց Մակեյանը։